滿腔熱忱創業，為求財？還是理想？熱話的大灣區，發展蓬勃，商機處處。不少港人更吼準地利之勢選作創業點。

特約記者：知樂

48歲「 皇仁仔」魏立華（Zackery）早於2011年在深圳斥資400萬元人民幣（下同）成立公司，研發語言學習App「 HelloTalk」，讓有興趣學習外語的人士下載，隨時隨地輕鬆學習。這個App過去10年間發展迅速，至今全球用戶逾3,500萬人。

說得一口流利日語和韓文的Zackery說，學習外語必須與母語人士作交流，「一直希望將呢個貼士share出去，2011年騰訊推出We Chat，我就想推出一個咁嘅App。」沒有這方面專業知識的他，憑着幹勁就膽粗粗走上一條科創不歸路。

創業初期壓力爆煲 患抑鬱焦慮失眠

十年前，網絡科技未成熟，「開始初期，只請兩個做過網站開發嘅人入公司，搞咗成年，都未做到demo，大家壓力爆煲，有一個仲話要劈炮。搞咗足足一年零九個月，我哋先出到ios版，一年後再出Android版。」Zackery說說，HelloTalk推出初期需不斷改良，科創就是燒銀紙，「2011年到2014年，公司研發增添員工，慳住使都燒咗400萬」，「我仲變賣咗幾層樓補貼」。

HelloTalk屬於互聯網企業，屬風險投資，公司在2015年首次獲融資1,000萬，可惜錢快來也快去，還未能收支平衡，「講緊每月仲蝕70萬，又負債500萬，喺嗰段時間我都被迫出抑鬱症，焦慮又失眠！」Zackery搲爆頭計數，開源節流，「將35名員工裁剩17人，再改變策略，終捱到收支平衡。其後又多次得到融資，生意開始穩定。」

2017年隨時勢把App當中一些項目制定訂閱收費，才開始轉虧為盈。最終用戶的支持，令Zackery認定它在巿場上有生存空間。

失敗中汲取教訓 看透掌握賺錢能力

HelloTalk至今除深圳總部，香港、廣州、上海和美國都設有辦公室，團隊更多達180人，近年佳績月賺80萬元。該App亦摘下創業南山2016創業之星「優勝獎」，次年再奪Google Play的Best of social apps獎項。

從生意人角度看，Zackery需要繼續燒錢換取更大規模的發展，「做科創係呢個玩法，搞互聯網真係要死幾轉，先可以生存落嚟，呢啲咪發展空間。」他由失敗中汲取教訓，掌握賺錢能力遠比坐擁資產更有前瞻性，無悔當年為保住公司賣樓填氹，過程中學會管理之道，「呢十年追求成長先最有價值。如果為賺大錢，頭幾年早就嚇怕轉行喇。」Zackery祈HelloTalk用戶未來可遞增到3億人。