「正義女神」林希靈和「聾啞女」美華有個約會。5個月前，當時仍是無綫節目《東張西望》主持的希靈被派往採訪，有女保安阿娟搶走美華亡父留下的公屋單位，全城關注美華在寒冬下被踢出家門的慘況。美華有口難言，希靈出頭跟阿娟對質，讓美華深受感動。

撰文：知樂
攝影/攝錄：烽水

去年大除夕，希靈宣佈離巢，雖心繫美華狀況，但礙於冇直接聯絡方法，未能跟進。皇天不負有心人，二人最近在協助美華的慈善機構「龍耳」活動上重遇，回復自由身的希靈更想利用自己能力，呼籲大家多為聾啞弱勢社群發聲。

希靈講得出做得到，自告奮勇義助龍耳宣傳，更情商攝影師Ben幫忙。拍攝現場，美華面對鏡頭怯場，希靈大搞氣氛令她放鬆心情，同時又指導美華擺甫士，龍耳創辦人邵日贊則從旁手語繙譯。

美華公屋業權訴訟未完

「美華事件」曝光後，美華近日獲派公屋，生活改善，但仍有心結未解開，除了要跟阿娟對簿公堂爭回李鄭屋邨的公屋業權，還要四出尋找亡父骨灰。美華爸爸於2017年底離世後，骨灰至今去向不明，龍耳去年接觸美華後，一直作出支援。

希靈日前接受《觀新聞》訪問，她表示唯一感到安慰是看到美華潔淨打扮，脫胎換骨，「佢而家好乾淨、好開心，成個人唔同晒，感激龍耳幫助佢，希望以後多啲人知道聾人需要。美華獲鄰居搵《東張》揭發事件，不過，我諗喺香港，仲有好多聾人或弱勢畀人蝦，冇機會發聲，希望大家畀多啲同理心，將自己幸福分啲畀身邊人。」

美華落泊時終日愁眉不展，近日陸續解困重現歡顏，加上重遇希靈，這天她全程笑瞇瞇。因獲悉希靈將在今年底結婚，美華即送上一對親手造的串珠公仔，祝福希靈和未婚夫、Viu TV藝人陳安立(Brian)成雙成對。

十分鐘「無聲」互動

希靈非常欣賞美華的小工藝，即場請教她學摺金魚和剪紙，美華的巧手把希靈比下去，「我天份唔掂，好渣！」希靈自嘲。美華評希靈的剪紙勞作只有40分，希靈作傷心狀，美華同情多送10分之餘，還做手語激勵。「之前探美華只係傾偈多，今日坐低跟佢學整手工，好特別，佢真係好犀利。」希靈享受與美華之間十分鐘「無聲」互動。

加持變「正義女神」，希靈說：「多謝網民，但我覺得呢個稱呼有少少誇張，老實講，香港人大家都好有愛心，只是有時擺喺心，唔擅於表露，我當時見美華有需要，做番人性去做嘅事，為佢發聲，睇到身邊朋友有需要，我哋只要講多句，或做多一個動作去幫忙，香港就會更靚，希望大家身體力行，做得幾多得幾多。」

33歲的希靈挾着「正義女神」的光環離開無綫向外闖，勇於接受新挑戰，「離開舊公司，我覺得好好，第一多咗時間，第二可以接觸多啲唔同嘢，喺舊公司7年都做類似節目，不時遇番同一班同事，反而出去後，同唔同電視台合作，接唔同工作有新嘗試。」她續說：「7年好似完成中學課程咁，出去望吓個世界，再唔離開，或會冇咗呢個動力同衝動，人一世物一世，乜都想試吓。如果我只做咗兩、三年就話走，咁又未累積足夠經驗，未ready。」

過往一直做主持的希靈，跳出舒適圈，她樂得乜都試。稍後獲邀客串港台劇集《獅子山下》扮護士，她昔日採訪不同個案苦主時的熱心，纖瘦外形，其實都適合扮演白衣天使，「可能因為美華呢次，就搵我試吓做姑娘。」希靈看到美華表情反問：「嘩，你暗笑嘅？」希靈的準備功夫是熟讀劇本，不想NG累街坊。

婚宴撮合單身友人

「初初出嚟，老實講有少少驚，始終唔知外邊世界係點。」希靈慶幸新經理人及未婚夫Brian雙重鼓勵，「Brian叫我唔使怕，有乜嘢佢會頂住，仲話會請我食飯。」Brian求婚，再加長期飯票，希靈自然更添信心。一對準新人將於今年12月拉埋天窗，婚禮構思大搞午間派對，「我哋驚疫情限聚令，搞晏晝婚宴，想將單身朋友安排坐埋同一枱，希望佢哋晏晝識咗，夜晚就去dating，撮合多啲朋友。」希靈這位「正義女神」似乎撈多瓣做埋愛神維納斯。

美華是龍耳的會員，該會2008年成立，是一個非牟利機構，全港五大香港聾人及弱聽人士綜合服務機構之一，主要協助聾人及弱聽人士爭取權益，同時協助聾人騷尋找工作機會。

場地：By Ben Studio
化妝：Dera Tse（林希靈）
髮型：Jackson Chui（林希靈）