轉到灣仔區工作，不時經過灣仔街市外圍攤檔，看到一位婆婆全神貫注織膠籃，手法純熟，吸引筆者駐足觀賞。勢估唔到香港仲有人從事呢門手工藝。記得家中多個Handmade籐籃、膠籃，全都是購自台灣。

阿婆叫陳太，喺上址擺攤賣雜貨數十年，近幾年才開始自學手織膠籃。她説，得閒就織，這些技術已後繼無人。織膠籃工序繁複，快則個多小時，慢則要一日多；每個價錢由數十元到一百多港元不等。

阿婆不會hard sell ，一副有麝自然香的態度。反之有街坊不斷在旁邊加把嘴hard sell。阿婆見對方誇大其詞，即出口糾正，甚至勸說「好心你唔好逼人買啦」。阿婆笑言，如自己見報，擔心「做唔切」。

當下種種事物追求機械化時，傳統工藝變得難能可貴，實在值得大家珍惜。好似陳婆婆咁樣，肯守護傳統，又唔怕辛苦，脚踏實地的人，喺香港已買少見少。筆者從婆婆身上感受到久違的香港精神。

文：愛探索之人張琛