𡃁模時代過去了。

當年出道的一班水着女，至今仍活躍娛樂圈的寥寥可數。34歲的「Viu一姐」陳俞希(Hailey)，13年前入行，也做過𡃁模。新臉孔的她未被觀眾叫出名字，只能先做「周秀娜師妹」，不過，目標清晰的Hailey朝着主持夢，咬緊牙關堅持到底。

文：阿比 攝：烽水

「托賴喇！托賴喇！真係都好彩。」筆者見證Hailey上位，她的確付出很多努力。2009年，Hailey由當時的經理人安排組成「八模兵團」出寫真集，女團賣大堆頭。

當年𡃁模做訪問，例牌要影水着騷身材，性感程度與大篇幅成正比。「嗰陣所有訪問都要着泳衣，唔止夏天，泳池着就話啫，studio又着。」賣肉博見報的潛規則，「嗰個年代係興呢樣嘢，老實講我係新人，做乜報道你，張相靚啲，人哋都好寫啲，大相必加名字、年齡同三圍表。嗰時咁多女仔影泳衣，我身材又唔係特別好，勁過我嗰啲大把，係都睇佢哋先，睇咗我或者都唔記得。」雖然要不停穿泳衣出鏡，但Hailey明白遊戲規則，「𠵱家反而會抗拒，一把年紀唔好搞呢啲嘢。」

爸爸嫌寫真暴露

「八模兵團」各有優點，女團間肯定有妒意，坐過冷板凳的Hailey說：「以前諗點解人哋都唔係做得好好，但就好多工作機會，我都好畀心機啫，一定有少少唔開心。」Hailey慶幸未放棄，輾轉獲機會入now TV主持節目，慢慢做下就搣甩了「𡃁模」味，更被遺忘曾出過寫真。

Hailey走過崎嶇路才成功轉營，綜觀現今新人入行路較易，「𠵱家途徑好多，可以參加造星比賽，又可以拍片做KOL，互聯網太方便，靠自己都宣傳到，唔同以前一定簽公司。」可以重新揀，她仍會選擇早入行，畢竟累積的經驗就是本錢，Hailey笑言現在從容面對鏡頭，也是由做𡃁模寫真擺甫士練習出來。

由𡃁模做到「Viu一姐」，Hailey不怕吃苦：「好鍾意份工，做落去唔會覺得辛苦。」新人低酬，工作量少，Hai ley初期靠家人接濟，後來不想再做伸手牌，「馬死落地行，除咗幕前，我空餘會去賣router，兼職做電話問卷調查，畀人cut線嗰啲，反正都冇人識我，叫做有啲收入，我都要食飯㗎嘛。」她也做過電腦節的game girl和promoter。家人支持Hailey追夢，唯獨陳爸爸有次看到她第二本寫真的超性感相不悅，「爸爸覺得太暴露、太激，有話過吓我。」

為攞料跪地遞咪

在now TV時代，Hailey都不是立即做主播，先要隨攝製隊出外景，那正是前線娛記工作，在活動上扑咪做訪問，「我去首映，唔係同其他藝人企backdrop(佈景板)前影相，而係企記者區等訪問。有時又派去『等更』，好似去機場等藝人返港，喺機場坐坐坐，唔知等幾多日，有行家瞓住等，突然會一班人衝過去，有人跑甩鞋，我又跟住跑，務求搶到見咪牌嘅位，甚至跪地遞咪，最緊要收到音，問到問題。諗番幾得意，呢世人點會喺機場逗留咁耐。」

「等更」無處不在，Hailey謂最辛苦是醫院更，「要企外圍，日曬雨淋，冇冷氣，去廁所唔方便。不過，醫院更都有樣好，有時名人會攞西餅請記者食。」