本周日是父親節，55歲的黃澤鋒說今天要帶妻女外出食餐好。

結婚十載的澤鋒3年前興奮宣佈超高齡太太陳麗麗自然懷孕，並順利誕下「小黃妃」黃熙恩，逾千日的成長，小黃妃為家庭帶來的歡樂，正是爸爸正能量泉源。

文：阿比 攝：唐家豪
場地：蕎藝創意坊

由小粉糰變成精靈妹的小黃妃，今年親手造了全家福掛門裝飾做父親節禮物，澤鋒拿着時笑不攏嘴，愛不釋手，「一、兩歲時太細個，未知父親節係乜嘢一回事，而家佢會做小手工，即使只送張白紙畀我，一樣咁開心，意義係佢送畀我。小朋友心意遠勝一切，呢份算係我收到第一份父親節禮物，一定要好好保留。有咗小朋友，好多嘢會珍惜，你畀嚿錢都唔及畀呢嚿嚸嘢我咁珍貴！」

一家三口日前到工作室跟老師上堂，親子互動做小手工，小黃妃搓紙黏土造爸爸的臉，圓臉貼上了頭髮後，她說還要加鬍鬚，對於爸爸臉上的每個特徵，她都觀察入微。

老來得女取消退休

老來得女的澤鋒，形容囡囡是天賜禮物，「係一夥星嚟，有咗囡囡，原來做爹爹係一個好大嘅責任。」由零開始，教學雙長，「湊女磨練耐性，仲學咗寛宏同諒解。」為了給小黃妃最好生活，澤鋒表示要打消退休計劃。

再忙，澤鋒都把「陪伴」放首位，他不想錯過見證小黃妃的成長，疫情穩定後，他恢復教游水，課與課之間，盡量抽空回家湊女，父女建立了親厚感情。澤鋒自爆會整蠱囡囡為樂，雖則如此，也是父女感情捷徑，他忽然問小黃妃：「咁你愛唔愛爹爹？」囡囡秒回：「有呀！」冧暈老竇。

澤鋒教女方法，「我係新派開放爸爸呀，囡囡有野性同曳嘅一面，我覺得唔好一嚟就乜都唔准，咁對小朋友唔好，我會畀佢適當亂嚟。」澤鋒從囡囡身上完全看到自己童年百厭的影子。

栽培囡囡做女飛魚

澤鋒重視家教、禮貌和規矩，曾做過游水運動員的他認為接受訓練是培養規律的最好方法，他觀察到囡囡遺傳了游泳天份，打算栽培她做「女飛魚」。「將來做唔做到運動員，要睇佢自己，接受訓練都唔一定攞到冠軍，不過訓練可加強接受能力，會變得有規矩，囡囡都幾野性，要搵方法管吓佢。」澤鋒表示不擔心囡囡，也擔心不來，「好坦白，我總有一日會老，我都會走，囡囡都要獨立生活， 尤其佢係獨女，更加要佢獨立啲。」 澤鋒謂將來不會教女兒游泳訓練，免得父女傷感情，但卻會陪她出賽，「從旁為佢分析，等佢知爹爹係一個智者，喺佢成長上幫佢一齊解決問題。」

父女相差52年，當澤鋒花甲之年，小黃妃到時才8歲，「我真係太遲生B，奉勸想做父母嘅，真係要『有仔趁嫩生』，咁我唔係話冇精力，係我想同佢有多啲共享時光。」小黃妃下月才3歲，澤鋒笑言腦中已幻想過囡囡將來出嫁畫面：「我應該等到呢一日嘅，佢嫁嗰日我一定好開心喇。到時唔會唔捨得，女係唔緊要 ，從來只有女兒貼外家，我就未聽過有貼男家喇，哈…哈…哈…」

高齡夫妻仲想再生

澤鋒認為做高齡父母其實也不乏好處，始終人年紀漸長，閱歷多了，容忍力較強。「我湊住囡囡，見佢發脾氣，我會好耐心睇佢發生乜嘢事，會諗辦法疏理佢情緒。」父母是子女的榜樣，澤鋒說小黃妃學習和模彷能力太強，所以他在囡囡面前都小心翼翼，「而家啲小朋友聽一句就入咗腦，所以我唔可以講粗話，唔可以喺電話發脾氣，連睇電視都唔可以亂鬧。」即使夫妻間有爭拗都要避忌，以免對囡囡造成壞影響。澤鋒早前喪母，偷偷躲在廚房落淚時被小黃妃發現，她窩心上前安慰爸爸。

如果上天再賜澤鋒小朋友，他說：「有都仲想生呀，不過呢啲係天意。」小黃妃是家中開心果，「我而家最重要係『小姐』，老婆照顧佢，老婆都係第一位喇！」澤鋒覺得一家人過得簡單開心，天天也是節日。「其實父親節、母親節，對我嚟講都係一樣，母親節係父親畀錢；父親節又係父親畀錢，兒童節都係父親畀錢，父親節要嚟做咩呢？不過都係咁講『牛耕田，馬食草，老竇賺錢仔享福』。」澤鋒口不對心，當老婆教小黃妃說上一句「Happy Father’s Day」及親親爹哋，他完全感受到這一天是重要日子。