雨僑、黃婉曼(Icy)、張嘉兒、黃澤鋒、岑潔儀(Zoey)、陳爽、Da Da及趙勁皓、楊潮凱、Annie G.和鄺文珣等，即急不及待帶着子女到九龍灣出席「Peppa Pig 玩樂日互動特展」，一連兩日的星級優先試玩日，小朋友玩得樂而忘返。
文、攝：比

雨僑和羅力威的女兒囡囡Harper於8月返N班，由於雨僑一直親力親為照顧女兒，小朋友較黐身，她很擔心女兒返學不接受跟父母短暫分離：「返playgroup老師教我，試吓搵個囡囡冇咁黐嘅人陪佢返學，我咪叫爸爸湊佢去，點知返咗兩堂，囡囡唔肯上堂，結果要我自己湊番，希望疫情穩定啲，咁佢返學，我就冇咁擔心，唔係又要停課，始終小朋友上網課，不及返學有群體生活咁開心。」看着女兒長大，雨僑又心思思想再生B，希望可以湊個好字。

黃澤鋒的囡囡「小黃妃」黃熙恩下月便3歲生日，她甫進場便非常興奮，看到小火車即嚷着要坐，黃熙恩坐上兒童小車卡「出遊」，經過時更不停向欄外的爸媽揮手，她甚至坐完再坐。黃澤鋒雖然跟囡囡年齡相差52年，但爸爸也童心未泯，陪着女兒玩波波池，黃熙恩今年9月便上K1，「之前疫情都冇上過N班，可能佢都見好多人，唔係好怕醜，我唔擔心佢返學會喊。呢排就要同佢戒片同教吓佢多啲英文。」黃熙恩學習能力很強，見到地上寫了數字的跳飛機，即懂得邊數英文數字邊跟着跳。自問是「貓爸」的黃澤鋒說：「只要唔危險同冇禮貌，我都畀佢自由放縱。」

Icy、Zoey和陳爽相約帶着子女來玩，因為疫情都半年多沒有見面，當小朋友在玩時，星媽們就坐下傾談。Icy的餐廳早前結業後，她騰出較多時間接主持工作，疫情嚴峻期間，Icy收工即趕回家煮飯，這位女廚神下月會在書展推出兒童食譜新書，分享如何為小朋友炮製健康餐單。Icy的大女Kyra下學期升小一：「噚日最後一日返學，放學就約埋朋友仔嚟玩，等佢開心放暑假。」現場的小朋友一見Peppa和George出現，即上前圍着，輪流合照。

「Peppa Pig 玩樂日互動特展–香港站」由今日(25日)至9月12日在九龍灣富通中心一樓 PORTAL 6311開放，場內會劃分多個主題區，讓入場小朋友分流嬉戲。小朋友可以在場內的互動體驗遊戲區內玩個痛快，包括有軟墊遊戲區、灌溉田園、跑步競賽等等，小朋友透過互動，除活動筋骨，又可以發揮創意精神。