夜媽媽係銀行櫃員機撳錢，開門走來一名南亞裔男子。你會否心裏一寒，接着想「仆街！今次實畀人打刧」，又或者跟表現跟往常一樣。膚色變成「原罪」！

Bipin Karma在香港出世，是第四代在港尼泊爾人。讀國際學校操一口流利英文，但在身份認同上仍有一定覺悟，盡量避免瓜田李下，他說原因好簡單因為「我哋都被標籤」。導演葉正恒想藉外國人學舞獅的題材，撥亂反正帶出同一天空下，可以共融雙贏的訊息，希望社會少一點猜忌，多一點信任。

文：思思 │ 攝：立
場地提供：姜氏金龍醒獅團

導演葉正恒、Bipin Karma早前在葵涌一工業大廈，為電影《一樣的天空》宣傳接受《觀新聞》訪問。Bipin以英語夾雜廣東話對答，他笑言自第一部跟林家棟合作的電影《手捲煙》後，廣東話已經有進步，他說︰「呢套係我第二部作品，本身有練開跆拳道，又玩開Parkor（飛躍道），所以手上比較敏捷，可以喺短期內pick up到，其實舞獅很有趣。」

現年25歲的Bipin在香港出世，在港已經係第四代。出世後到尼泊爾生活到8歲，再回港就讀國際學校，日常溝通以英語為主。對於身份認同，Bipin沉思了一會，然後說︰「我會覺得自己係尼泊爾裔香港人，香港人不單只代表華人，係有來自唔同地方嘅香港人，有好多唔同背境，喺呢度住咗好耐嘅人，佢哋喺香港工作、讀香港學校、有身份證，其實都係香港人。」他認為一個融和的社會，不應該因為膚色，而有不同待遇。

香港人不單只代表華人

一般人會當「晚間櫃員機提款事件」為笑話一則，但Bipin有點唏噓，講起一單親身經歷。話說有趟他到A店買了點東西，之後再行到B店逛，正想離開時，他忽然意識到「南亞人攞住一袋二袋，會唔會畀人懷疑偷嘢」，在這個陰影下，他無奈去到店員面前，假意詢問一些九唔搭八的問題，以表示自己「身冇屎」。

正如情境題的下半部，該名南亞人一開門，同時揚起手上提款卡，口中諗諗有詞，以廣東話話「我有卡㗎，我嚟攞錢㗎……」重複又重複，以正視聽。

跟店員搭訕一事後 ，Bipin自問「點解我要咁做呢」，就算來到第四代，思想依然要同既有的先入為主觀念戰鬥，他無奈的說︰「我哋都被標籤。冇想太多我到底係尼泊爾人定香港人，但到目前為止，我有一半人生都喺香港，呢啲問題對我嚟講太複雜。如果真係要講，我會話自己係尼泊爾香港人。」

提到今次拍攝有趣的地方，是電影中Bipin有機會講尼泊爾的故事︰「會提到尼泊爾唔同嘅文化同風俗，第一次可以用母語講故仔。呢點我會讚導演好有勇氣，有好多導演都做緊唔一樣嘅嘢。」Bipin成為演員後，可以透過飾演的角色，窺視不同人的內心世界，有助解決身份認同的問題。至於語言問題，Bipin認為演一個角色，最重要的不是語言的問題，是心或理念的問題，演員要明白角色的掙扎，才可以得心應手。

舞獅無關膚色同國籍

導演葉正恒話本着同一樣的天空，有着不一樣故事的概念拍出來。舞獅這項國家非物質文化遺產，由鑼鼓，到舞頭、舞尾，都需要互相配合。而當一群人有着相同目標同理念時，膚色同國籍已變得無關重要，正好配合「融和」這主題。葉正恒話︰「Bipin在戲中『曾仔』呢個角色，喺入到獅會之後，都改變唔到部份人嘅歧視，不過當大家嘅信念越一樣，就算想法唔同，都會意識到合作先能夠勝利。」

至於揀Bipin的原因是貪對方身手敏捷，他說︰「佢識跆拳道、又玩Parkour，身手敏捷，可以喺短期內pick up到舞獅。最初選尼泊爾演員玩舞獅的原點，唔係想講歧視，醒獅呢件事因唔係單人運動，需要好多人配合，喺打鑼打鼓咁嘈嘅環境之下，嗰幾個人要專注同一方向、做同一件事係幾難。想法唔同但方向一致嘅話，做出嚟嘅嘢都唔會太差，拍電影都一樣。」

導演話拍《一樣的天空》片從Bipin中有所得着，過往從報章、新聞中讀到很多新聞，都不明其他族裔的一些想法同行為。拍攝中從Bipin身上暸解多了其他種族的諗法，開始包容同理解︰「大家都係世界公民，係唔同環境，自然有唔同想法。」