「師傅愛你。」玄學家七仙羽口頭襌，言出必行，她定期在深水埗的彿堂樓下向基層派物資。

這天，七師傅冒雨率領着愛徒「八鮮乳」郭奕芯和幾位善信又出動，「以前我係會派錢，原來係犯法，唔敢再派，改派食物。呢度近街巿，方便買到蔬菜同水果，派嘢又唔怕畀人趕。如果喺半山派，都冇人嚟攞，又會畀人拉，呢區好需要物資，呢啲都係修行。」先後有近百長者街坊來排隊取食物和衣服，有婆婆拿了物資還都笑呵呵說「我愛師傅」。

撰文：比華利   攝影｜攝錄：烽水、唐家豪

54歲的七師傅近年主持過ViuTV節目《七救星》和《七福星》，妙法打救藝人，她搞笑，講彿偈，普渡眾生。「可以幫到人就幫，我唔係要踩低別人抬高自己，佢哋喺呢行都係有夢想，拉到一個上嚟就拉一個，人哋成功，自己都開心。」七師傅竄紅，狂接廣告商演，名利雙收，「我以前都好多人客，口碑唔錯，生意一向好好，紅咗成日要去拍節目，反而唔得閒做生意。」 

EQ超強 對惡評一笑置之

「名利財富都帶唔走，要咁多都係負累，每個人最終都要面對死亡 ，何必咁執着。」萬千寵愛於一身的七師傅收禮收到手軟，獲送大量名牌服飾，她除了出鏡較貪靚，平日打扮則樸素簡約，訪問當天她身上穿的紅衣是早年在印度禪修時的舊衣：「就算人哋送豪宅畀我，心態都係咁平靜，豪宅、名車、甚至板間房喺我心目中都係一樣，身外物。」

人紅惹是非，七師傅被揶揄是「神棍」，「呢行唔係個個都理解，有啲人反對彿教，以為拜偶像呃人，我覺得要包容尊重唔同宗教，每個宗教都係導人向善。」七師傅對惡評一笑置之，EQ超強。只有一個人會令她「爆發」，他是拍拖10年的荷蘭籍老公阿龍，「外國人文化同中國人唔同，我唔出聲，佢唔知我諗乜嘢，所以就講出嚟，做唔啱會鬧佢。」火頭離不開雞毛蒜皮的小事，她坐阿龍車遇上阻塞都會被鬧一餐。

與夫共識不生育 有B阻修行

七師傅哦爆阿龍，卻又很恩愛，他們早共識不生育。「有BB就礙事，阻住我修行。我都同佢講唔好成日掂我，即係男女啲嘢，因為我要修行呀！」要阿龍禁慾，不擔心他偷食？「我同佢講『你都要修行，我哋嚟到人世間要提升靈性，成日搞埋咁多男女關係會影響靈性，盡量唔好搞呢啲嘢』，佢對我長時間，我要佢唸經，我都有帶埋佢去印度同尼泊爾修行。」

夫妻關係豈非是柏拉圖式戀愛，「有時係，有時唔係。」七師傅稱讚阿龍唔鹹濕，「老公從來唔睇鹹片，唔係我唔准，係佢冇興趣，男人你唔提醒佢，未必會去睇，越提越想睇。」她試過借用老公電腦，發覺他從未看過鹹網，上網都只是看賽車或電影 。

很多人說男人「用下面諗嘢」，「好多和尚20幾、30歲，年輕力壯，點解佢哋冇咩慾念呢，都係修行修出嚟，當你修行明白道理，慾念就減低。如果成日喺男人面前播經文，佢咩慾念、咩癮都會冇晒，但如果你成日搵個靚女去挑逗、刺激佢先撩起佢嘅慾念。老公日日禪修打坐唸經，邊有慾念。」阿龍美中不足是未能隨七師傅茹素。

有傳阿龍是王室後代，畢業於哈佛大學，從事金融行業，高學歷有家底，外形魁梧。就算阿龍純品，也難保沒有外來誘惑？七師傅出金句「我度門永遠打開」，「老公問意思係咪永遠可以返嚟，我話唔係，度門永遠打開，即係我隨時都可以走。」阿龍一聽就會答「最愛最愛最愛就係你啦」，甜言蜜語冧老婆。

桃花不斷 狂收求愛短訊

阿龍最愛七師傅甚麼？「佢覺得我善良，個樣又唔係差，佢眼中好靚啦。我同佢都鍾意做慈善，大家觀念一樣，政治立場，乜嘢都一樣，大家好夾。」阿龍舊愛曾是一名美女，但一旦發現對方只是「花瓶」，走夾唔唞，遇上轉數快又聰明的七師傅就走唔甩。七師傅御夫有術，阿龍聽教聽話，「順其自然，就開開心心，我從來唔諗咁多，開心就一齊，唔開心咪走，冇所謂。」

有觀眾緣的七師傅，桃花緣也不少，多年來不乏裙下之臣，「我好多男仔追，有靚仔、有小鮮肉。老公擔心我偷食多啲。我𠵱家日日仲收到好多短訊，個個都話愛到我不得了，明知有老公都仲暗戀我。」七師傅愛阿龍，堅決不亂搞男女關係。

七師傅原名趙玲，她是馬來西亞華僑，成長時住過台灣和新加坡，父母在英國做生意。由於年幼時體弱多病，就拜師學習風水命理，曾負笈歐美，大學主修新聞系，碩士則主修商業管理，七師傅也做過記者，但因為對風水術數有天份就轉當風水師，為善信解困。七師傅過去兩年先後主持Viu TV節目《七救星》和《七福星》爆紅，人氣急升。