獨立歌手路難行，雷深如（J.Arie）三年前選擇這條路，就一直咬緊牙關堅持。

J仔大學時修讀法律，畢業後沒進律師行打工，反而加入樂壇做新人，這急轉彎的決定，一度其父母失望，及至胞弟接棒當了律師，J仔愧疚感才減輕。入行9年，演藝路途上上落落，但未有打擊她對音樂的熱誠。

做音樂再慳也是燒銀紙，J仔過去都曾「撲水」發展歌唱事業，2019年做獨立歌手後便大爆發，放膽去創作「精神病系列」，先後出過《雙面哈菲》、《陰陽道具》、《判官之印》和《M的悲劇 MASOCHIST》，曲詞題材敏感，備受爭議。雖然並非傳統主流，因為真我性情流露，她有不少捧場客，「呢兩年發展幾好，離開大台 ，漸漸越趨好轉，希望可以慢慢持續落去，我唔係好奢求突然之間要大紅大紫，一定唔係不到紅館心不死嗰一隻，我希望可以穩定，自己寫嘅歌有人會喜愛最緊要」。

fb live練歌練聲 籌百萬出碟

「實在餓得太耐，抑壓咗太多年，諗番2019年開始自己有得出嚟做獨立歌手 ，個人就一直衝，好想將30幾年冇做過嘅嘢推晒出嚟，究竟一鑊過爆晒出嚟之後，真係爆完呢隻碟同開咗首個演唱會，我個人開始冇咁情緒化，以前好容易少少嘢就喊得好勁 」。

不過，三年衝鋒陷陣，J仔形容現在似瘋狂減肥後，跌入停滯位，處身迷惘位的她，需要再發掘另一爆點，但她有信心可跳過，「𠵱家係一個平台，但唔係樽頸嚟」。近年人氣多了，J仔有機會獲其他音樂人邀請合作，這樣可令她尋找新方向突破自己。

有工開，有收入，就可以「籌旗」造碟，記得J仔曾提及再慳着一腳踢，作歌，拍MV加剪接，再慳一首歌至少都要８萬元。J仔構思了下一張碟會出8首歌，有數得計，再加出碟後開騷，她至少要籌到100萬。目前距離目標仍有一段距離，「手頭籌咗十分一，所以希望大家可以畀多啲嘢我做。」J仔周末會固定開fb live讓歌迷課金點唱，「每次唱兩個半到三個鐘，好多謝大家，真係樂迷養起我，其實香港嘅樂迷係可以養得番起香港嘅歌手， 只要歌手畀個心出嚟做音樂」。

她表示，開直播只為一個信念，並非最大收入來源：「如果直播一次能多過1,000蚊，我都當贏，開頭最少試過得幾百蚊。我唔係為賺錢而開，想用嚟練歌同練聲，網民嚟點唱，睇你識幾多歌 ，泰文、日文、韓文同國語都要唱， 同一時間跟樂迷互動，又練自己個膽同臉皮，只要唔尷尬就得，有時中間係有甩漏。」

 

年輕偶像帶領潮流 堅持唱廣東歌

J仔堅持自食其力，抗拒要家人或朋友接濟，「想接濟就搵我開歌，或搵我做project。我唔鍾意不勞而獲，一分耕耘，一分收穫，我唱足三個鐘畀你，哪管你只畀兩蚊， 我都好grateful。」

J仔堅持自食其力，抗拒要家人或朋友接濟，「想接濟就搵我開歌，或搵我做project。我唔鍾意不勞而獲，一分耕耘，一分收穫，我唱足三個鐘畀你，哪管你只畀兩蚊， 我都好grateful。」

環顧近年樂壇走勢，年輕偶像帶領潮流，「希望大家除咗聽主流歌手，都支持下獨立歌手，分少少關心畀我哋，聽埋我哋啲歌。近呢一、兩年我發覺多咗司機大佬聽廣東歌，我會堅持唱廣東歌。」J仔的歌不商業化，她說：「我冇公司，自資造碟，自由度高啲、寛鬆啲，但𠵱家好多自我審查，有時你諗個界線可以去到邊，電視台又有佢哋尺度，我性格鍾意直白咁表達出嚟，但又怕冇人肯播。有人勸我可以婉轉啲， 我行偏鋒，都係想做番自己， 你唔播就唔播喇，靠大家聽囉！」

 

J仔雷深如原名雷琛瑜，香港大學法律系畢業後放棄做律師，繼續追音樂夢，獲金牌經理人黃柏高簽約加入樂壇，2013年出道。憑着靚聲成為2013年新人王，次年代表香港出戰「香港亞洲流行音樂節2014」奪得「亞洲超級新星大獎」。J仔2019年離開太陽娛樂，轉做獨立歌手，同年簽約邵氏，一年半後見發展未如理想，向樂易玲提出解約。去年參演節目《七救星》，被七仙羽加持，人氣反彈。

撰文：比華利
攝影：John Chou
化妝：Yu @ Jessica Chan Workshop, Jessica Chan
髮型：Bowie Lo @ AdmiX Hair Styling
場地：友利冰室 x 勿當奴