現年91歲的黃夏蕙在兩個月前預告要離開香港去美國跟家人團聚，要走的一天終於到來了！夏蕙BB同老公潘炳烈乘坐今日下午1點的飛機離港，兩人今早11時便到機場Check in辦手續。她早上接受《觀新聞》電話訪問時說：「呢日要嚟喇，我都真係好唔捨得港嘅嘢同朋友呀！」

文：比華利

夏蕙BB穿上綠色連身短裙配綠色手袋，變身「綠魔」造型，孖着老公現身機場。她對《觀新聞》表示：「第一站會先同老公去探佢囡囡，因為外孫即將出世。希望遲啲香港疫情穩定，我會飛返嚟見大家，最想可以年底返嚟裝頭炷香。」夏蕙BB也坦誠，擔心坐長途機，「我都帶定防疫用品，上機會抹過座位先坐，少食嘢同少去廁所呀」。

「大家唔好掛住我 我只係一個傳說」

臨別依依，夏蕙BB也更新了fb：「原諒今天我要告別了！當大家睇到我呢張相嘅時候，我應該準備起飛，先去台灣，然後轉機去美國。大家唔好掛住我，因為我只係一個傳說，傳說總會過去，不要迷戀我！哈哈！剩下嘅就只有一個過被世人復述嘅故事。希望大家可以做到故事中嘅主角，將呢個傳說發光發亮！有能力嘅朋友，去幫助需要幫忙嘅朋友，冇能力嘅朋友，暫時忍耐，相信仲有一日，不斷磨練同改進嘅日子下，你都可以成為一個有能力幫助別人嘅人物。再會！」