由古天樂監製及主演的科幻特技電影《明日戰記》備受關注，戲迷除期待睇特技效果，主題曲《明日之明日》出自音樂大師陳光榮，並由ANSONBEAN（陳毅燊）及COLLAR成員Winka（陳泳伽）主唱。此曲MV更於今日（16日）在各社交平台上架。

ANSONBEAN當初獲悉被邀主唱，心情又興奮又緊張，知道歌曲中有很多高音位，對他來說有一定挑戰性，所以錄音前不停練習，還與歌曲監製陳光榮多加溝通，又把練習的demo傳給監製作指導。

拍檔Winka@COLLAR 則說：「我平時收到新歌，會先了解係咩曲風同種類，然後就會去做功課，特別聽多啲同類歌曲，但呢首歌好特別，定義唔到係邊一種類型，佢係為《明日戰記》度身訂造。我錄音之前將歌曲聽咗好多次，因為這首歌嘅情感拿捏要好到位，唔係唱得好型就得，係唔可以用單一嘅情緒去唱出嚟。今次第一次同監製陳光榮合作，佢畀咗我好大信心，同埋好大自由度，同我又嘗試咗好多種唔同唱法，最後就唱出咗而家呢個比較迷幻嘅感覺同效果。」

同時為本片創作配樂的歌曲監製陳光榮亦分享戲中劉青雲的一句對白「我哋要繼續行落去」，而為主題曲帶來靈感，副歌第一句歌詞中寫到「一齊一齊 繼續行落去」，就是希望把看畢電影的感受都放進去電影主題曲之中。Winka@COLLAR 都被歌詞深深感動：「對我嚟講，歌詞最深刻係『絕望下結集同路 原來能逆風去』，令我感覺到就算有時面對逆境，只要大家都有相同信念，結集了大家的力量，事情就會有可能做得到，亦剛好濃縮咗整套電影主要意念。呢個正正係同我守護嘅信念一樣，如我同COLLAR咁，大家喺呢個階段要經歷唔不同的嘅挑戰，只要我哋都咬緊牙關，就可以一齊度過。」

此外，《明》片內容是描述地球，在未來已被嚴重污染，寸草不生，倖存者只能在風沙及有毒空氣中逆境求生，人類的未來只能寄望在殺傷力強大的外星生物「潘朵拉」身上，對其作出基因改造，於是B-16區的空戰部隊奉命出動，以生命作賭注，執行一場九死一生的任務。該片將於8月25日上映。