寵物領養|資深貓奴:首要考慮同動物嘅關係 年齡品種次要

-

寵物領養|資深貓奴:首要考慮同動物嘅關係 年齡品種次要

離別係每位寵物主人最傷感、最怕面對嘅課題,所以唔少人喺領養時,都會傾向選擇比較年幼嘅動物,希望毛孩陪伴自己嘅時間長啲,同時見證毛孩嘅成長。不過,資深貓奴阿Joe則認為,喺領養寵物時,首先要考慮同動物之間的connection,反而年齡、品種等等都不是最重要。

文/攝:愛協

愛協一直提倡以領養取代購買寵物,今年6月份,Pepper 同Pancake呢對15歲嘅姊妹貓貓嚟到愛協,尋家短短兩星期,慶幸遇到佢哋命中注定嘅奴才/看護——負責愛協教育及社區發展工作嘅阿Joe。

Pepper同Pancake姐妹情深
Pepper同Pancake姐妹情深

無法抗擊嗲功 延續貓奴生活

過去10幾年,阿Joe在家中一直養了兩隻可愛嘅貓貓,但直至去年,呢兩隻分別14、15歲嘅貓貓相繼離開,他收拾好心情後,今年決定再領養一對貓貓返屋企,延續佢嘅貓奴生活。兩個月前,緣份將阿Joe帶到一對15歲嘅老貓身邊。

當時阿Joe每日午飯時間都會落去領養中心探兩隻老貓,過咗一個星期之後,呢對姐妹成功俘虜咗阿Joe嘅心;考慮到自己有養老貓嘅經驗,加上兩隻貓貓令人無法抵抗嘅「嗲嗲功」,阿Joe終於決定將佢哋帶返屋企,仲幫佢哋改咗一個又辣又甜嘅名——Pepper同Pancake。

屋企好舒服啊。
屋企好舒服啊。
躺平?
躺平?
帶我返屋企啦!
帶我返屋企啦!

照顧得宜 老貓可以健康又活潑

阿Joe表示,寵物係生活上嘅拍檔,大家要合拍先可以相處愉快。未來嘅事無法預計,所以貓貓嘅年紀並唔影響佢對貓貓嘅愛同相處,「開始一段關係唔會諗住完結嗰刻㗎嘛,喺老貓身上,我學懂咗活在當下」。唔少人都認為,老貓就一定會伴隨大大小小嘅疾病,但只要照顧得宜,老貓一樣可以健康精神又活潑!

愛協表示,7月份有唔少動物成功找到幸福歸宿,其中58隻為貓貓、39隻為狗狗、23隻為倉鼠、兔仔、雀仔等小動物。大家嘅一個領養決定,可以為更多動物改寫佢哋嘅故事,希望大家參加「助養動物計劃」。

 

上一篇新聞
下一篇新聞