泳兒出道時有個花名叫「怪物級新人」。2006年出道的她，獲英皇力捧，因為處女作《感應》好評如潮，為其打響頭炮，威盡年底各大電台的頒獎禮，奪得「十大中文金曲」及「新城勁爆歌曲」，更是香港樂壇史上唯一一位憑第一首派台歌奪多台金曲獎的歌手，同時又囊括四台新人獎金獎。

新人有好開始，事半功倍。「怪物級新人」轉眼已入行16年，會計學士的泳兒當年放棄唔做會計師當歌手，此決定是否已計掂條數？「我計自己條數係唔叻嘅，我信感覺。以前讀緊會計時都會計劃少少，例如今日做啲乜嘢，要完成啲乜嘢，但我都係好short term，唔係一個好長遠計劃嘅人」。泳兒在娛樂圈工作後發覺不能太計較，「長遠planning真係好難計，呢行講求天時地利人和，仲要有啲luck先得，計唔到機會幾時嚟。不過，可以計住自己可以準備幾多。有時計得太多會好大壓力，當達唔到預期又會影響心情」。

希望同謝霆鋒做對手戲

下月迎接「女人四十」的泳兒說：「40歲係一個唔細嘅數字，我希望呢個開始為自己做啲嘢，嚟緊有多啲勇氣去突破同嘗試，唔單止係唱歌方面，仲想試吓其他範疇，都想試吓演戲，以前會覺得怕醜，依家人大咗，可以試吓放開去做。」

「我前半生生活多數係為人哋，依家後半生嚟緊，我想問下自己有乜嘢想要做先，做好自己，咁就滿足。」

既然要試，泳兒必須豁出去，她想挑戰扮演精神分裂或變態性格的雙面人，還想跟大師兄謝霆鋒做對手戲，「同謝師兄做戲，雖有壓力，但壓力係可以產生動力，希望啲導演畀機會我試吓」。

不善表達 沉默會被遺忘

泳兒早年行事比較被動，不善表達，往往就會錯失很多機會。面對過去起跌，她近年蛻變，「我有人群恐懼症，對唔熟嘅人慢啲先撻着，我唔講嘢又會畀人好寸同冷漠錯覺。其實我唔覺得自己好自閉，有時都好想同人傾偈，但唔知點樣同人打開個話題」。沉默變成被遺忘，泳兒承認早年不懂主動跟英皇溝通很蝕底，「入行時覺得自己好新，冇信心去講自己想講嘅嘢，耐咗就變成一個習慣，開始時唔講，慢慢就收埋咗，人哋唔知你點諗，人哋都估估吓」。

回頭望，這個缺點直接是絆腳石，泳兒就嘗試去改變，「如果出道時冇咁懵，條路可能會快啲順啲」。她自從幾年前頓悟後，整個人也脫胎換骨：「依家感覺自己個世界闊咗，唔想再錯失機會，我會放膽同公司講出心中想要咩，公司一直都好支持，大家關係仲好咗。所以，識得同人表達自己都係一門學問。」問到泳兒現今對英皇還有甚麼訴求？「希望公司支持我去建立一個多面睇，有 guts嘅泳兒」。

一曲帶來人生轉捩點

過去16年唱過的作品中，泳兒表示2020年的《溝渠暢泳》是處於人生低谷時收到的最佳禮物，此曲為她帶來不少殊榮，更成為首位2000年代出道歌手奪五台冠軍歌，《溝》為她重拾信心，是人生事業的轉捩點。泳兒另一首喜愛的歌曲是《荊棘海》說：「有句歌詞『能越過就有未來』變咗我座右銘，只要咬緊牙關行過就會有將來。」泳兒自爆低谷時會爆喊抒發情緒。

捱過苦，泳兒擁有今天的成績，她不忘多謝父母的支持，「由我入行至今，媽咪都一直支持，爹哋則最初有反對，但我入行初期冇收入，佢哋經濟上幫我，搭車食飯錢從不缺」。當泳兒經濟可以獨立，她表示再沒要求父母資助，有多餘錢甚至儲下來，早前還給雙親送了安樂窩，她不想父母要捱貴租，最想他們過無憂晚年。

泳兒原名陳家欣，她於8歲時隨父母全家移民新加坡，23歲畢業於新加坡南洋理工大學會計系，喜歡唱歌的她同年往參加第一屆「絕對SuperStar」，比賽中雖落選，然而塞翁失馬，焉知非福，她回流香港參加2005年度「英皇新秀歌唱大賽」奪得亞軍及「最佳型格獎」，雖敗於冠軍鍾舒曼之下，但二人同時簽約英皇，泳兒翌年就獲出碟，並改了藝名，她的新人路算很順暢，一直効力英皇，入行16年都受公司照顧，泳兒的一把靚聲還有機會推出HI-FI唱片。