泳兒從不隱瞞有個髮型師男友，拍拖逾10年，兩人已是同居關係。男友陪泳兒度過高山低谷，二人感情穩定，卻未有結婚計劃。

泳兒不認同「一紙婚書」可白頭到老，「結婚對我嚟講，唔係好重要，如果話結婚係行多步，就要等一個更加good timing，有時簽咗紙可能變咗退後一步」。下月便40歲的泳兒直言此刻對結婚沒憧憬，「記得細細個時，有諗過30歲前要結婚同生小朋友，人大了，睇住呢個世界太多變化，結完都可以離，好多嘢係預計唔到，所以我覺得結唔結婚真係唔係最重要，至緊要自己活得開心，綑綁住大家，未必係最好嘅選擇。」

怕高齡唔敢生

泳兒不急做人妻，那生仔呢？再不生就可能要變高齡產婦，她搶白，「依家都高齡，太高齡就唔生喇」。泳兒未來規劃沒預生B，「生小朋友太大責任，我又冇話唔鍾意小朋友，鍾意同自己生，真係唔同，生咗就要擺好多時間心機去栽培佢，仲要畀佢一個好環境成長。我將來真係生咗小朋友，可能就唔可以再做嘢，要全心全意去照顧佢。」生育計劃還是順其自然。