周潤發有四兄弟姐妹，全部南丫島出世成長，發哥家中排第三，大家姐是曾做攝影記者的周聰玲。童年時，玲姐跟老三發哥最要好，兩姊弟經常通山跑，她說弟弟自幼精靈聰明，甚討長輩歡心。

發哥18歲投考無綫第三期藝員訓練班加入娛樂圈，演藝路上發光發亮。即使搖身變成國際巨星，仍然樸素親民。他越紅生活卻越簡約，低調不喜應酬，發媽仍在生時，子女過時過節都相約聚會。自3年前發媽離世，加上疫情，四兄弟姐妹疏於往來。玲姐形容姊弟關係是「楚河漢界」，保持距離避免矛盾。

上網知細佬行蹤

「發媽喺度，我哋每星期都同佢飲茶，發媽走咗，大家都分開住，自己做自己嘢開心咪得，我同發仔冇見都有3年，疫情關係，佢有一班人去行山，我主要周圍影相，大家生活又唔同就少見呀。唔單止佢，我仲有個細佬同妹妹都唔係成日見。」

玲姐比發哥潮擁有智能手機，她笑言：「網民成日喺街野生捕獲佢，碌吓手機就知佢喺九龍城買餸，同去咗邊度行山。」玲姐也不會跟發哥通電，「我從來都冇打畀佢，咁佢有佢嘅世界，我又有我嘅世界，各自搞掂。每個人都有自己生活圈，你成日煩人，人哋會嫌你好煩喇，識朋友好，親戚又好，個個都知我性格，我鍾意獨來獨往，隨緣，隨喜，見到你就皆大歡喜，最好個個都有自己朋友，冇需要咁刻意呀！」玲姐最欣賞發哥可以做到「超然物外」。

感激發哥贈西環單位

玲姐獨立，不愛依賴別人，但也承認發哥很照顧她，玲姐在西環獨居的單位，就是早年發哥送贈，「佢又買屋畀你住，又畀我錢睇醫生，兄弟姐妹算係咁。」

發哥出身貧窮，爸爸行船，發媽是全職主婦，除照顧四名子女，還要耕作、養豬、賣茶粿賺外快補貼家用，長女玲姐，自幼就要協助媽咪做家務，湊弟妹。發爸早逝，發媽成為一家經濟支柱。玲姐及弟妹先後離開南丫島到巿區返學和工作。發哥完成中三課程也輟學幫補家計，做過擦鞋、搬運工人和酒店服務員等工作。

金句玲語錄句句爆肚

不講不知，玲姐雖然年逾70，但十分精靈，隨口都爆出金句，金句玲語錄，不只押韻有平仄，字面有意思，發人深省，聽後必會心微笑。

「日日好時光，快樂又健康，癲癲廢廢，做人唔識閉翳，神神癲癲，快活過神仙。」

「人哋環遊世界，我就環遊新界。」

「側側膊，唔多覺，阿媽鬧，唔好駁，睇大戲落北角。」

「來無影，去無踪，好似一陣風，搵佢唔見人，自動玩失踪。」

「原來我輕輕鬆鬆，獵影寄情中。」

「捉棋要找對手，跳舞要搵個partner，拎相機就我話事，我鍾意行就行，企就企，影就影。」

「口噏噏當秘笈，噏完就走得，當堂可過骨，唔知道咪笑到氣都咳。」