疫情第五波後，HR大家姐Rachel用zoom in人已成常態，雖說疫情嚴重，但好多大公司in重要職位時都唔敢只係視像見下就算，最少都出去飲杯咖啡見下candidate真身。

 文：Q姐（越過觀塘廠廈走過中環置地）

Reception May打inter call入嚟：

「Q姐，約咗老細見Marketing Director嘅胡生到咗。」

「請佢入嚟，順便叫姐姐斟杯清水跟埋入房啦！」

「er… er… 我諗唔使喇，應該好快會見完… May欲言又止。」

人未到味先到

隱約聽到腳步聲，隨之係一陣十分「怡人」嘅氣味撲面而嚟，正所謂人未到味先到，感覺就好似放工時間，地鐵入面五個背心大漢齊齊高舉雙手圍住我咁。回過心神，就見到一個身形有番咁上下，恤衫衫鈕無扣好嘅中年男士，用手巾仔抹緊汗，步向我面前。

我故作冷靜「老細，胡生到咗。呀！疫情空氣流通少少好，不如唔好閂門啦！」

老細撳緊電話，抬起頭，正想開口講嘢之際，忽然安靜起嚟閉上嘴皺一皺眉，用好性感嘅鼻音「嗯」。

喺呢個時候，縱橫秘書界十幾年嘅我梗係火速打畀Rachel姐了解下發生咩事，兼畀定心理準備佢啦。

「Shxttttt ！Oh my God…」Rachel姐拋下呢句就收咗線了。

講完呢個電話，胡生已經芳蹤杳然，留下嘅只有餘「香」。同時老細已經攞起電話着咗火咁狂噴，足足噴咗十分鐘，唔使講都知佢鬧緊邊個啦。從此，冇見兩個月嘅Rachel姐終於蒲頭，着住對3吋高踭鞋咯咯聲穿梭於office大小角落，用zoom in人嘅時代亦告一段落。