Finance Suki心情特別靚，皆因今日係佢last day，下午喺office派散水餅兼四圍搵水吹，忽然佢憂心忡忡咁走埋嚟，「Ｑ姐，大鑊喇！我好似派錯散水餅畀老細呀！」

By Q姐（越過觀塘廠廈走過中環置地）

下？！ 散水餅都有對錯之分?「我派咗『做啦柒頭』曲奇畀佢呀！不過我見佢即時袋咗入西裝褸袋，希望佢未睇到啦！」我忍唔住大笑咗出嚟。

西環名物 老闆娘手筆

「你唔知咩？ 此乃西環名物，啲字係餅店老闆娘一筆一劃咁寫上去。最衰都係我太驚青，頭先喺走廊撞到老細，佢問我嚟緊有咩好路數，我緊張得滯竟然抽錯咗右邊袋嘅曲奇畀佢！今次慘啦！」

原來Suki左邊袋袋住正正經經嘅「多謝關照」曲奇，派畀啲高層兼無咁相熟嘅同事。至於後生玩得又熟落嘅就會得到右邊袋嘅「做啦柒頭」曲奇。雖然今日係Suki嘅last day，理論上都唔使再對住老細，但佢都深明山水有相逢呢個道理，所以內心都好忐忑。見Suki平日都幾nice又識做，我就決定出手幫下佢啦。

「佢都睇得出我玩得喎」

「老細，Suki個傻妹幾有心思喎，今日last day派餅，成熟嘅同事佢就派『多謝關照』曲奇，幾得體呀！後生又玩得嘅同事佢就派款搞笑嘅新派曲奇，估唔到佢做Finance嘅都幾玩得！」

老細簽簽下文件，從佢嘅西裝褸袋拎咗塊曲奇出嚟望一望。「哈！係喎！估唔到我哋平時好少接觸，佢都睇得出我玩得喎！」我望到老細個嘴角微微上翹，得得戚戚戚咁，相信Suki呢鋪應該大步檻過！ Suki亦果然好識做，馬上撳電話order大大杯廢水慰勞我。