承印:觀傳媒集團有限公司   地址:香港灣仔駱克道283號華興商業大廈1001室

追夢80後|拒著西裝 唔做律師轉做噴畫師

-

追夢80後|拒著西裝 唔做律師轉做噴畫師

「人生最難搵嘅,就係自己鍾意嘅嘢,同自己鍾意嘅人。」80後噴漆塗鴉藝術家Billy是個幸運兒,兩樣都找到了,訪問當天,他的女友作伴示範模版噴漆(Stencil);被喜愛的事物包圍,Billy 訪問期間嘴角從沒有掉下來,也難怪他為了喜愛的事,放棄高薪厚職的律師工作。投身塗鴉藝術界十多年,Billy的工作室的作品琳瑯滿目,其中幾幅仿霓紅燈作品最為奪目,他說:「因為霓紅燈好有香港特色,如果呈現到(喺作品),就好似呈現自己屋企嘢畀人睇咁。」
文:周董|攝:Ramond Ho

Billy受訪當天,梳着油頭,頸戴余文樂、木村拓哉也為之瘋狂的日本銀飾Goro’s 羽毛頸鏈,身穿闊Tee及膝短褲,一個標準的板仔輕便造型;讓他進入噴漆塗鴉世界的,正正就是滑板,「因為以前踩板,最平嘅滑板就係冇圖案嘅滑板,所以買咗返來自己畫,機緣巧合之下見到通渠師傅用一塊模版喺牆上面噴自己嘅名、 聯絡方法、服務,發覺呢個方法都幾有趣,於是就自己買咗罐噴漆返來試,咁就試到𠵱家都停唔到。」

Billy將經典名畫「最後的晚餐」加入自己的創作風格。
Billy將經典名畫「最後的晚餐」加入自己的創作風格。

無師自通 由噴滑板轉噴牆身

Billy 特地帶來這塊彌足珍貴的「人生第一板」,可見上面寫有「LIVE FREE」(自由生活)、「SAVE EARTH」(拯救地球)字樣,中間有一隻持槍的熊貓,十分反斗,中間寫着「BILLISM」(民粹主義),突顯滑板世界的自由反叛世界,Billy 笑說:「嗰陣仲係用皺紋膠紙勾個形出來,唔識用模版整。」在沒有YouTube教學的時代,Billy無師自通,自己嘗試做到為止;這塊「第一板」與他在工作室內掛起的近期滑板作品,雖然看起來技藝相對生疏,不過當時也受到不少滑板朋友青睞,向Billy八卦是從哪兒買的滑板,得知是出自他的手筆後,紛紛託他幫忙噴板,也成為了他首份與噴漆塗鴉相關的工作,「當賺餐飯,我幫人噴板,佢就請我食餐飯咁」。

模版噴漆最少要有4層才能突顯立體感。
模版噴漆最少要有4層才能突顯立體感。

練手兩年後,單是噴滑板已經滿足不了Billy,他轉移到噴牆身——他需要更大的畫板。Billy回想:「嗰陣真係會走入村,甚至去村公所敲門問『你哋有冇啲牆可以畀我噴吓呀,噴完如果你唔中意我油返佢』,咁通常都OK。」一天下來,Billy 噴了一幅鯉魚作品,願意提供「畫板」的村民,請求Billy「唔好油返佢」,讓他當下覺得十分高興。

Billy慶幸自己能做到喜歡的事。
Billy慶幸自己能做到喜歡的事。

中五品行成績皆差 被踢出校

鯉魚亦是Billy 喜愛的創作主題之一,他分享道:「因為鯉魚係逆流而上,亦都代表堅毅精神,有一日佢會去到終點,所謂『鯉魚躍龍門』,就會化龍,對我嚟講係一個好勵志嘅故事。」在上環太平山街的一段上坡路,一間咖啡店牆身就曾經有Billy 的作品,2米高2米闊的作品,通常Billy受託作畫,晚上10時到凌晨4時就會是他的創作時間,他只要一晚時間,就可以完成噴漆塗的作品,這也是Billy尤其享受的時光,「噴漆嘅時候就好似電影入面bullet time(子彈時間) 咁樣,全世界會冇聲嘅、停晒嘅,而呢段時間就係真真正正屬於我自己嘅時間;一路噴就好似將煩悶噴走咁。」他補充:「因為你做鍾意嘅嘢同唔鍾意嘅嘢,個成功、失敗幾率,都係五十五十。」也難怪他會為了噴漆放棄當律師。

Billy曾獲邀請在建築物外牆噴上作品。
Billy曾獲邀請在建築物外牆噴上作品。

Billy 笑指,其實自己中五時因為品行成績皆差,一度被踢了出校,輟學後工作一年,早上派報紙、下午當茶餐廳夥計、夜晚炒散拆櫃,也是這個經歷讓他重整人生,「唔知大家知唔知咩係『雞翼櫃』?呢啲櫃一運到來時,啲雪塊已經融晒,所以一開櫃就有大批雪水流出來,入面有蟲又有好多味,有姐姐會即場重新包裝同重新雪過啲雞翼,我好記得同一晚我嘔咗四次。當晚就話畀自己聽:『我唔想咁樣過一世』。」亦在那刻,他決心要兌現自己每一個承諾,而他的第一個跟自己的承諾,就是小一時寫的「我的志願是要當一名律師」。

連食肆鐵閘也有 BIlly的作品。
連食肆鐵閘也有 BIlly的作品。

百足咁多爪 不放棄噴漆塗鴉

不過後來Billy 放棄律師的原因,讓人十分嘩然 ,他說:「個爆發點真係因為我唔想着西裝。」他說完後,看在場所有人呆滯的樣子,再三笑言這真是主因,「我成日都講笑,如果可以T恤、短褲出庭,可能到𠵱家我都仲做緊。」

此外,Billy還是中小學辯論隊領隊、教育管理公司老闆,還會抽時間接噴漆委託,「百足咁多爪」,他形容自己的性格為「認真地求其」,自己會認真嘗試,即使結果不好也沒相干。至於噴漆塗鴉他從來沒想過放棄,「可能(噴漆)會做到生理上真係做唔到為止。」