女強人陸詩韻|轉型化身「美容達人」 遇挫靠家人支持重新出發

-

女強人陸詩韻|轉型化身「美容達人」 遇挫靠家人支持重新出發

05年港姐亞軍陸詩韻(Sharon)近年在商界打響名堂,賣護膚品升呢「美容達人」,去年更奪得「大灣區傑出女企業家獎」。

文:比華利|攝影:Marco
攝錄:KM|場地:THE EAV’S PLACE

女強人在私下卻這樣說,「我唔想㗎,邊一個女仔唔想有人照顧,我都想做少奶奶湊小朋友,或者湊吓貓貓狗狗,有啲世藝,唔使咁辛苦」。做事搏命的Sharon竟笑言「我不想努力了」,明顯講反話。

Sharon走過42年的人生路,最崎嶇肯定是早年遇上老千商人,以為找到可付託終身的人,對方卻是感情騙子,要求她做貸款擔保人,錢到手即走佬,Sharon替他孭債,遭銀行追討71萬元,同時發現對方隱瞞有妻女,面對人財兩失,慶幸家人支持,她得以重新再出發。

Sharon認為,產品要推陳出新,才能找到生存空間。
Sharon認為,產品要推陳出新,才能找到生存空間。

仍然相信愛情

「可能人生總有波折,我接受,我OK,唔會怨天尤人。早啲經歷好過遲,(如果)年紀大,好難企番起身,亦未必接受到」,但隨着年紀增長,陰影散去,「我仲好相信愛情,但就唔會似以前咁毫無保留,多咗警惕,人實際咗」。

Sharon指,即使遇過不愉快經歷,但仍相信愛情。
Sharon指,即使遇過不愉快經歷,但仍相信愛情。

跌過痛過,令Sharon更堅強。她最了解自己,「有啲朋友話,其實係因為內心好脆弱,所以外表先咁強,究竟係咪呢?每個人都有弱嘅時候,唔係話外表強,就代表佢内心都好強,可能只係一種自我防衛保護」。Sharon謙虛不敢逞强,「我比較好勝同鍾意挑戰,同以前比強,𠵱家嘅我多咗一份思考,諗嘢會深入啲,後生時好多嘢唔怕,人大個咗會識分輕重,有啲嘢係咪要行呢步,會諗達到目的又會唔會影響到其他嘢,包袱多咗,既要顧住屋企又要諗吓家庭,係多咗顧慮」。

Sharon亦是愛貓一族。
Sharon亦是愛貓一族。

擇偶揀強者

Sharon外表強勢,卻不擔心嚇走追求者,記者笑言:「一定係太多,嚇走少少都唔怕。」她答:「我都想係咁呀!我覺得追求者如果見到我個樣係咁,未了解就驚,佢咁已經唔啱我喇!我要揀一個好強嘅對象,見我咁兇狠都唔驚,咁強先啱我。」

Sharon希望找到一個比自己強勢的對象。
Sharon希望找到一個比自己強勢的對象。

「我成日畀人話鱷魚頭老襯底,對方有得畀我小鳥依人,我係可以㗎。」首要是遇到Mr.Right,讓Sharon有安全感,就可以釋放出小鳥依人的一面。「啟動我呢個按鈕男士要出現咗,我先可以activate到呀,暫時未有一個人令我有衝動,呢個mode唔可以亂啟動,我怕會令人誤會。老實講,我唔係大家睇到咁強,處理事情上,好多男士決策同心思都好過我。自問未去到坐好高嘅位置,我極其量做到第二把交椅,我仲有好大進步空間。」

Sharon表示,一旦再覓交心對象,必須花時間了解及溝通。「我希望有欣賞佢嘅條件,每日可以喺佢身上攞到啲新知識。」人大了,一切隨緣。「以前細個係會諗30歲前結婚生仔,而𠵱家到咗呢個年紀,未必會冒險生小朋友。」她也未有雪卵,「唔生小朋友,兩口子都唔需要結婚」。

「演藝工作充滿繽紛色彩,有適合角色搵我做,我絕對願意,唔會介意人哋搵我做主角定配角。 一朵花冇咗側邊啲草,點會襯得出佢嘅亮麗。」Sharon坦言還是喜歡幕前工作,只要角色有發揮,她也肯當「茄喱啡」。

Sharon參加港姐加入娛樂圈,至今出道17年,幕前工作只有4年,她早年便去創業,跌跌撞撞,反而為自己開拓出新路向。不過,人生閱歷豐富了,助她演出更有深度,所以遇到好角色都會接演過戲癮,2018年演出無綫劇集《深宮計》中「宋王妃」,雖然戲份不多,但卻令觀眾對她留下深刻印象。

Me Time喝一杯

選美是Sharon的轉捩點,重新選擇仍會揀這條路,「唔加入娛樂圈,遇到嘅人同事物唔會咁精彩,我會記得晒過去每年發生過咩事,回顧以前好勝,唔聽人講,橫衝直撞,𠵱家做生意,公司有同事要照顧,要出糧,責任大咗。做老闆冇話好定唔好,必須要問究竟係咪想負上呢個責任。」

 

Sharon深信力不到不為財,訪問前一直在公司埋首開會。當完成手頭繁忙工作,她都需要減壓,Sharon即轉場到餐廳享受Me Time,嘆一杯充滿仙氣的雞尾酒,「呢個係我最enjoy嘅moment,每日返工咁忙,放工有少少酒精relax吓係最好,係另一個狀態,做番自己。」