小小蝴蝶酥一塊，10秒鐘足以把它消滅，從美味而來的快樂則是無法量度。這口香甜的背後是做餅師多年苦功，加上數小時精心製作的成果。蝴蝶酥正是Mouton Sweet其中一款皇牌產品，這間由夫妻檔主持的小餅房靠口埤在十年間累積眾多「回頭客」，風評極佳。今年餅房更添新成員兒子「正正」，一家三口在餅房創造令人快樂的甜點，正是他們夢想中的幸福畫面。

文：亦童｜攝：Ramond Ho

推開餅房的門，一室牛油香，陽光穿過玻璃窗落在整潔的廚房。Cherrie與丈夫Felix各佔廚房一角，一位在為橙香朱古力蛋糕裝飾，另一位正在把酥皮摺成蝴蝶形。廚房外，正在圍欄中的幼兒一雙圓滾滾的大眼睛正在圍欄中觀察父母工作，那就是未滿一歲的正正。Cherrie說帶小孩上班是丈夫Felix的主意：「我最初都好懷疑，點帶呀？但原來不停諗方法，兩個人配合，又好似得。佢（丈夫）好神奇嘅係，件事未發生已經有信心覺得係可行。」

同樣神奇的是，Cherrie從小就知道自己要當做餅師傅。以甜水果當英文名字，Cherrie中學時就愛鑽研蛋糕甜點，為同學預備小吃蛋糕，上課時齊齊偷吃；大學選修酒店管理，暑假在酒店餅房實習，畢業後在咖啡店工作，認識了同樣嗜甜的Felix。「個心一路向住呢樣嘢（開店）走，橫掂都要搵工儲錢，不如搵啲令你汲取到經驗嘅工作。」Cherrie說。

為證能力願蝕做 不盲目追潮流

儲了第一筆資金後，二人租了一個單位開始經營網店。「頭一兩年，我哋未放棄自己份工，有個後盾慢慢試，（雖然有）困難但唔係好大壓力，年紀仲細，試兩三年唔OK再算囉，無咁大壓力。」但初期訂單少，加上要提供多款蛋糕讓客人選擇，材料成本高，基本上每一個蛋糕都蝕住做，Cherrie點頭：「但嗰時無計咁多，你會覺得竟然有人買、有人訂，淨係因為客人買咗個蛋糕，而個評價係好嘅，你就已經好開心。」

後來，二人先後放棄穩定工作全職造餅，實現開餅店的夢想，但家人少不免擔心，二人異口同聲形容自己硬頸，Cherrie笑言：「你越係話唔得，我越想做多啲，就係要證明畀你睇！」Felix補充：「硬頸都唔知好定唔好，有時好似令自己好辛苦，但辛苦完呢，又有啲回報返嚟。」

兩個人一唱一和將創業的壓力輕描淡寫，提到遇上任何困難或是做重大決定時，總是說「最多都咪返去打工」。的確，做兩三年就結業的小店爲數不少，反觀Moutont Sweets不擅宣傳，不設門市，反而撐過十年。原因之一是省下高昂的地舖租金，比較容易控制成本。另一成功要素，或許是二人始終專注於自己所愛。「我哋比較少去比較，有時睇得太多好似仲難創作自己想做嘅嘢，好容易做咗同其他人相似嘅作品。某段時間或者會興起某款蛋糕，但都係一閃而過，所以唔想追潮流，想跟番自己理念。」Cherrie坦言曾有猶疑：「都有諗過係咪太自我…如果我哋肯做潮流嘢，可能賺多啲，但我哋覺得做自己嗰套比較開心自在。」

為幼子減產 安於現狀不擴充業務

保持專注，對糕餅有着高要求，他們創出一款又一款精緻糕餅，以實力贏口碑，證明自己能力。不過，踏入第十一年，二人在某方面或許不能再做自己，那個「掣肘」正是兒子：「以前做唔完訂單，可以無限加時間，做到幾夜都得！𠵱家唔可以喇。」每晚到特定時間，未滿一步的正正就會扭計，像是一顆提醒父母要回家休息的鬧鐘。Felix與Cherrie亦樂意減產陪伴兒子成長，帶小孩上班的日子已經有半年，至今比想像中順利。

旁人或曾建議他們擴充業務，但擴大經營要兼顧太多方面：「如果我哋做到好大規模，可能就係專注管理而唔係整餅，但我哋真係幾鍾意做製作呢部份。」當下正是最好，一如品牌理念 Live your dream，二人此刻已活在夢想中：「其實個理想唔係好大㗎咋，可以一路做落去已經好開心。呢刻做緊自己想做嘅嘢，又可以長期見住自己小朋友，熟客上嚟傾下偈，已經係好開心嘅狀態。」