老細宣佈公司會喺11月尾安排一個曼谷食玩瞓狂歡之旅，獎勵Sales Team逆市爆數。大家開心到飛起，男同事商量去邊度clubbing飲酒跳舞，女同事就傾下邊個場可以揼骨加濕平。當大家話題離不開曼谷，唯獨Sales Director Kenny悶悶不樂，斯人獨憔悴。

By Q姐（越過觀塘廠廈走過中環置地）

見到Kenny匿埋pantry一角飲咖啡，我就問Kenny：「做乜有得去玩都咁愁呀？」Kenny嘆一嘆氣：「唉！個trip我仲未知去唔去到呀！老婆話我又唔係負責亞太區，問我點解公幹要去曼谷喎，如果純粹去玩就覺得我冇必要，因為佢湊仔肯定仲需要放鬆過我咁話！」

有明禎BB You are not a 「窿」

「原來你家有嚴妻！不過冇得去都唔係損失嘅，咪返office靜靜哋做嘢囉，何況you are not a 『窿』，你條team仲有女神Katie未過試用期都冇得去，食lunch有伴呀！」見Kenny平時捽數個狠樣唔見晒，我都於心不忍安慰下佢。

「似明禎BB嗰個？」叮！Kenny恍如由沉睡中醒過來。翌日喺窗前撞到Kenny拉緊筋，佢神采飛揚話「公司政策真係不近人情，尋晚同老婆講Katie好慘慘豬呀，未過試用期冇得去曼谷，要留喺公司同我呢個老鬼朝夕相對！老婆聽完沉思咗5秒忽然口風180度轉變，話覺得疫情呢兩年我都辛苦喇，應該出去relax下，而且都係時候去開拓下東南亞市場，仲力勸我都係要去曼谷。我就唔太想去嘅，不過老婆叫到就是旦啦！」講完就忍唔住大笑繼續拉筋。