承印:觀傳媒集團有限公司   地址:香港灣仔駱克道283號華興商業大廈1001室

中港澳首位|最高級別朱古力女品鑑師 開啟味蕾與視野之門

-

中港澳首位|最高級別朱古力女品鑑師 開啟味蕾與視野之門

一群人站在酒吧角落品酒,配搭着火腿和芝士,還有三顆小小朱古力。明明是一口可吞掉的大小,他們卻拿起朱古力觀看,靠近鼻子聞聞,才咬開一半慢慢咀嚼,這都是剛從朱古力品鑑師陳詩婷(Christy)身上所學的技巧。

文:亦彤|  攝:Ramond Ho

Christy本為護士,機緣巧合得知朱古力品鑑這門專業,熱愛探索的她專程飛到英國倫敦讀國際朱古力品鑑機構IICCT(International Institute of Chocolate & Cacao Tasting)的可可鑑賞課程,學習朱古力歷史、原產地、製作過程,亦啟發她對朱古力的五感。「原來朱古力要擺係口入面,用體溫融化佢,嘩,我覺得時間好長呀。但係時間拉長,先體驗到以前唔明嘅風味、層次、前中後韻味,呢啲以為係好複雜嘅嘢,原來一啲都唔難,只要你放慢學習。」Christy一頭栽進朱古力的萬千世界,更遠赴可可原產地之一的秘魯深造,成為IICCT認證之中港澳首位最高級國際朱古力的女性品鑑師,全球僅約50人擁有這個資格。短短幾年間,Christy走過全球多個城市,擔任國際賽評審及教授品鑑課程。

Christy認爲品嚐朱古力不僅是口腹之樂,也是一門藝術
Christy認爲品嚐朱古力不僅是口腹之樂,也是一門藝術

拆解朱古力迷思 學會選擇

「如果我無讀呢個課程,我都唔知咩係朱古力㗎。」Christy以往如普遍香港人,生活節奏快,進食有如車輛入油,只為填飽肚皮。「品酒、品啡、品茶越來越盛行,大家知道唔係淨係飲一啖咖啡咁簡單。食朱古力都係一樣,就算唔講咩層次,至少要知道點為之好。」一般人認知法國、德國、比利時等屬朱古力大國,但卻不知當中可可原產地其實是非洲和中南美洲,亞洲國家如泰國、印尼、馬來西亞及台灣亦有種植可可。坊間認為黑朱古力對身體最好,卻忽略朱古力原料的優劣;白朱古力因為含糖量較高而令人卻步,卻不多人了解白朱古力的可可脂乃是優質油脂,含有不飽和脂肪酸。

Christy認為坊間對朱古力誤解太多,曾遠赴秘魯深造,到朱古力原產地認識可可。
Christy認為坊間對朱古力誤解太多,曾遠赴秘魯深造,到朱古力原產地認識可可。

Christy認為坊間對朱古力誤解太多,若知如何選擇品質及控制進食份量,品嚐朱古力不僅是口腹之樂,也是一門藝術。「由種植可可果到發酵可可豆,點樣烘培、研磨其實均有好多學問。出產前要熟成,最後調溫,每道工序都影響朱古力嘅亮澤度,呢門工藝絕對係製作者日積月累、精益求精嘅結果。」工藝品被Christy拿在手中觀賞其光澤,掰開兩半聽其聲,再聞其香,才放入中口中細味。

獨自往秘魯深造 開拓眼界

為了能更具體地形容風味,Christy在飲食方面亦變得更放膽:「就算唔鍾意食嘅都放入口,記低個味道,建立自己一個味道字典。因為我哋品味時需要好多形容詞,如果缺失咗一塊,我就形容唔到。」對Christy而言,品味不只是打開五感:「五感係一個人與生俱來嘅嘢,只係我哋嘅生活冚住咗,放慢先係對好多人嚟講好困難嘅事。」學習欣賞,每次用餐都可以是一次冒險與學習。「周生(周星馳)嘅電影都講得幾好,人人都可以係食神。你有無留意自己五感呢?人人都可以做得到。」

朱古力帶領Christy走出舒適圈,獨自飛到秘魯修讀最高級可可品鑑課程。原以為南美洲很落後的她卻眼界大開,走過臨海而建的購物商場,嚐過數之不盡的香草和辣椒。「其實落後嘅係自己,向外走先發現自己係井底之蛀。呢次旅程開咗自己眼界,亦都提醒自己唔好自以為乜都識,要向唔同界別嘅人學習。」現時Christy致力於傳播品味朱古力之道,望越來越多人了解朱古力,同時消除對其的誤解。