臨近年尾，好多同事對KPI呢三個字聞風喪膽。KPI全寫係Key Performance Indicator，即係「關鍵績效指標」，企業用嚟量化員工工作能力，年尾做appraisal，管理層都鍾意以KPI去計算同事嘅得分。KPI以前多用於sales team，不過近年好多公司即使同銷售無關嘅職位都要追KPI。

By Q姐（越過觀塘廠廈走過中環置地）

靚女公關Ivy喺走廊撞到行政部主管強哥：「強哥強哥，群姐今日沖咗第三杯咖啡畀我，我真係胃痛頂唔順喇，仲要我簽名作實。我諗住慢慢飲啦，芳姐又話要趕住洗杯，叫我拿拿聲飲埋佢，唔係佢洗唔夠杯，追唔到乜乜唉佢就大鑊喎！」。咁啱經過嘅市場部Ruby加入控訴：「強哥強哥，清潔蓮姐唔肯畀盒紙巾我，叫我問其他同事借住先喎，今個月慳唔夠30盒佢就追唔到乜乜唉呀」。

月沖千杯咖啡跑數

行政部Macy路過，幫群姐、芳姐講好說話：「無辦法啦，群姐話唔識咁多，總之佢每個月要沖1,000杯咖啡，沖完又要記低數好大壓力，而且今個月聖誕假期多，佢怕跑唔夠數，所以月頭大家飲多幾杯啦！佢年紀大都怕無咗份工，大家幫幫手啦！」

公司政策矯枉過正我都無能力改變，唯有幫得就幫，飲多兩杯咖啡。難怪有人話KPI全寫其實係Kill Person Indicator，唔係同事飲咖啡飲死，就係群姐、芳姐年尾被公司賜死。