Johny帶有膝頭十字韌帶撕裂的傷患，成功在限時內完成了飛越大嶼100公里賽事，與他對運動創傷醫學有深刻認識有關。Johny解釋，曾有傷患的跑手，運動前後必須做足熱身運動，以免劇烈運動觸發舊患；另外，平日要好好保護受傷部位，「若膝蓋出現發炎、水腫，需要到診所抽走膝蓋水腫；長遠來說，定期注射透明質酸，改善關節痛」。

膝頭行路卜卜聲 關節退化先兆

Johny受訪時示範不同的熱身方法，例如「撥水」、「拜神」等拉筋動作，讓關節等位置暖身，防止跑手在運動時受傷，「唔好睇小呢啲運動前後15分鐘的熱身，真係好重要，特別係我哋呢啲受過傷嘅跑手」。

他續稱，因膝頭十字韌帶撕裂傷患，需定期在膝頭關節注射透明質酸，改善關節活動功能，「第一次跑完飛越大嶼後，曾傷過膝頭發炎出現水腫，我即刻搵醫生抽走水腫，先至完成到比賽」。

Johny強調，不但是運動創傷出現關節功能問題，有一些職業會出現關節痛問題，例如職業司機、保安、地盤工人等，腿部關節經過長期勞損，會出現關節痛，「大家唔好忽略，一直唔理會惡化，痛到行唔到，就需要更換人工膝頭。如果發現膝頭行路有卜卜聲，就係關節退化先兆，立即睇醫生檢查」。