何沛施（Sheree）自小聽長輩講述不少生意經：外公、舅父與表哥分別經營洋服生意，媽媽開設花店，父親則是前報社營運總監、廣告公司Projects Promotion創辦人何偉斌。27歲的她或者早以注定步長輩後塵，去年開始經營電商業務，首年賺逾百萬，成績斐然，她卻說「我無預期會有咁好成績」。

文：亦童｜攝：烽水

從小在飯桌上聽父母聊營商之道，Sheree確是耳濡目染：「我諗佢哋無特登培育我，但食飯會講今日個客點呀，開會情況呀，傾偈嘅時候都會學習好多。」不過她認為性格更重要：「由細到大我都鍾意揸主意，鍾意冒險，所以覺得自己適合做生意，一路就去行呢條路。」

見電商發展潛力 說服父親擴展新業務

畢業後加入微軟做市場推廣，Sheree後來轉職至4A之一、日本最大廣告公司電通Dentsu，接觸國際客戶讓她深入了解電商的需求與趨勢，也因而洞見廣告公司的機遇。Projects Promotion由1996年成立起就以製作報章特刊為主要業務，近年亦開始協助客戶於社交媒體上宣傳，Sheree因此提議設立新團隊為客戶開拓電子商貿：「爸爸都會有少少顧慮，始終公司係紙媒為主，但電商就真係好電子化，佢覺得同公司性質有分別，甚至叫我自己開一間新公司。」但她認為經營電商其中重要一環是媒體宣傳，公司在紙媒的專業正是電商所需，只要整合業務便可為客戶提供一條龍服務，成為公司優勢。營商多年的父親終被說服，Sheree於去年加盟公司出任業務總監，創立主理電商及數位營銷的新團隊。

做生意很現實，數字就是成績。新團隊於短短一年為公司帶來逾100萬港元進帳，累積的三四十個客戶由飲食、口罩到時裝、珠寶都有，其中一個最大型項目是為一家澳洲高級傢俬品牌於內地建立網店。因應當地網絡、法規、認證等等均與香港有異，Sheree團隊為客戶釐清法律，建立網上付費系統，制訂適合當地的宣傳策略，成功於貿易展期間為客戶帶來網店人流，生意大增。「我相信未來越來越多客搵我哋做同類業務，一來我哋對當地法規同電商環境越來越熟悉，二來香港政府有提供相關資助，幫香港公司擴展，我哋會協助客戶申請，過往所有個案都成功拎足資助。」

創業初期壓力爆煲 調整心態用經驗儲自信

Sheree提起成績時自信滿滿，誰也猜不到她剛加入公司時的模樣。原來在她回到父親公司時，對自己要求甚高，巨大壓力令她失眠，一度受精神問題困擾，身體亦出現毛病而需要求醫。「第一次自己做生意，好驚如果遇到問題點算？以前有上司帶住，𠵱家全部自己負責，做錯決定可能關乎法律責任，變咗壓力都幾大。」身體警號迫使Sheree學習調整心情，放下憂慮，專心於當下與團隊完成一個又一個項目。當經驗漸增，客戶漸多，Sheree的信心亦隨之增加：「比起一開始，我哋解鎖咗好多嘢，當初都無諗過可以有國際客，涉獵嘅範疇亦越來越廣，比我當初想像嘅行遠咗好多，成個團隊成熟咗好多，我都唔會輕易有太大壓力，唔再忽然失眠。」

別忘記Sheree是個愛挑戰的年輕人，搞定心態後，工作挑戰在她眼中通通變「好玩」：「比起步時好玩咗㖭！以為整網店係好技術性嘅嘢，後來發現有好多有趣嘅工作，例如去做採訪、發新聞稿，設計、拍攝等都有好多創意元素喺入面。」早前她們為一間洋服店建立能遙距試身的網店，顧客透過網上系統與裁縫對話和度身，所選布料會即時置於3D模型上，客人安坐家中都能精準看到訂製西裝的效果。「科技發展得好快，今日興直播，聽日又興另一樣嘢，我哋都要每日學新嘢，有國際視野，先可以為客人洞察趨勢。」為即時解答客人疑難，Sheree自學程式編碼，增加客戶信心：「最主要功勞都係嚟自團隊，因佢哋係Shopify（網店系統）嘅專家，幾難嘅問題都可以隨時為客戶解答，我好自豪有呢個團隊㗎！」

何沛施簡歷

年齡：27歲

學歷：畢業於香港理工大學BBA

工作經歷：曾任職微軟、日本電通香港公司，現為Projects Promotion業務總監