承印:觀傳媒集團有限公司   地址:香港灣仔駱克道283號華興商業大廈1001室

千名歌迷迫爆九展預祝「軒公誕」 張敬軒感恩:我與大家同在

-

千名歌迷迫爆九展預祝「軒公誕」 張敬軒感恩:我與大家同在

下星期三(1/2)是張敬軒生日,由於軒仔已多年沒有跟朋友或歌迷慶祝生日,今年一眾歌迷為給他一個驚喜,遂自發性地於九龍灣展貿中心一場地舉行展覽,為軒仔預祝生日。

現場佈置除了有多張軒仔的巨形靚相,歌迷更將軒仔於賀歲片《超神經械劫案下》中角色「有成」製作成蛋糕,認真有心思。軒仔到場前,已有千多名歌迷於場內等候,迫爆九展,場面墟冚。而當軒仔到場後,歌迷的尖叫及歡呼聲震耳欲聾,憾動全場。期間有歌迷點歌,希望軒仔可以唱《賽勒斯的愛》,軒仔爽快答應,在毫無預備的情況下,即興清唱一曲送給歌迷,唱畢後,歌迷亦十分識做,即來一個全場大合唱《櫻花樹下》作回禮。

三年疫情開咗三次演唱會

軒仔表示十分多謝大家於過去一年,無論在他的音樂、演唱會及對這次電影的支持,「有時我自己啲歌、演唱會唱得唔好、自己嘅歌做得唔滿意,甚至乎呢套戲有沙石嘅地方,但我呢班fans都好努力去撐我!呢啲係我嘅福氣,所以我好感恩。呢個世界有咁多人、有咁多出色嘅artists,但大家選擇嚟follow我、支持我,好多謝大家。」軒仔又謂人生有很多階段,人大了,慢慢知道人生當中並非所有事情都是應份,因此會額外珍惜。

一向不愛過生日的他坦言這一次特別想,「三年疫情我開咗三次演唱會,中間都有好多阻滯,但每一次重開,大家嘅氣氛同支持都會加倍,所以好感恩喺呢三年疫情入面,大家喺網上又好、喺各個場合大家俾我嘅support。見到好多新面孔嘅加入,希望大家知道自己喜歡嘅係一個乜嘢人,好似交朋友咁。我成日覺得我同我嘅fans有心靈上嘅交流係好重要。有時我唔係成日出嚟,或者有時唔喺香港,但大家喺生活當中,張敬軒都會起到一個支撐嘅作用,精神層面又好、心靈層面都好,我與大家同在嘅,多謝大家。」