風再起時|三大影帝齊集 何珮瑜刷靚棚牙與梁朝偉激吻

-

風再起時|三大影帝齊集 何珮瑜刷靚棚牙與梁朝偉激吻

由兩大影帝梁朝偉和郭富城主演的香港史詩式電影《風再起時》昨晚(7日)舉行首映,導演翁子光及一眾演員包括:何珮瑜、謝君豪、吳卓羲、金燕玲、張可頤等亦有出席。

何珮瑜表示首次跟影帝兼男神梁朝偉合作十分緊張。
何珮瑜表示首次跟影帝兼男神梁朝偉合作十分緊張。
《風再起時》片方昨日舉行盛大首映禮。
《風再起時》片方昨日舉行盛大首映禮。

首次見面就俾佢對眼電到

電影中飾演梁朝偉的太太何珮瑜(Jeana)表示首次跟影帝兼男神梁朝偉合作十分緊張,坦言被他的電眼迷倒,「第一次合作,我稱呼佢做梁生,梁生就好幽默咁話:『你嗌我Tony都得㗎啦。』我話:『Tony?係嘅,Tony哥。』自此拍戲期間我都係叫佢做Tony哥。第一次見面就俾佢對電眼電到,望住佢對眼我呆咗幾秒,實在係太有魅力啦!」

《風再起時》團隊陣容鼎盛。
《風再起時》團隊陣容鼎盛。
何珮瑜有幸與三大影帝合作。
何珮瑜有幸與三大影帝合作。

何珮瑜大讚梁朝偉是一個很好的前輩,十分關心後輩,而且十分幽默,「記得嗰陣時我啱啱智慧齒發炎,要喺拍攝當地睇牙醫,最後剝咗兩隻智慧齒,Tony哥知道,每一日開工佢都會問我:『點呀,你隻牙好番啲未呀?』我話:『好番啲啦。』好搞笑,佢好關心後輩啲牙㗎,哈哈。同埋因為佢知道我哋緊張,所以佢都成日都會講吓笑,好幽默咁講,可能節奏比較慢,你係feel到佢係想緩和個緊張氣氛。」

除此之外,原來電影中二人有激吻戲份,「我最多對手戲就係同Tony哥,因為我係飾演佢太太。其中有一場kiss戲,我真係好緊張,事前已經叫買定烏籠茶、買埋牙刷清潔口腔,我諗呢場係我咁耐以嚟最緊張嘅kiss戲,都NG咗三、四次,哈哈。」電影背景設定在上世紀中葉的香港,Jeana飾演的「南江太太」的服裝造型也非常具有上世紀的懷舊韻味,尤其是在與梁朝偉飾演「南江」探長結婚場景中,她所穿的婚紗非常復古精美,讓人眼前一亮。