宇宙間有好多神秘能量，喺辦公室最怕遇到嘅就一定係負能量。Alice有「負皇」呢個朶並唔係浪得虛名。今日佢一早又喺pantry放負：「電腦壞咗，做唔到嘢實俾老細炒魷啦。唉！連部電腦都放棄我呢個年輕人！」「負皇」份人就係咁，好少事都會睇成係自己運滯。同事們冇深究「負皇」到底發生過甚麼事，只希望盡量避開佢，唔想被佢負到自己都冇運行。喺呢個moment，識咗「負皇」好多年嘅Don忽然出現，仲娓娓道來「負皇」年輕時嘅一個經歷，令佢變成而家咁負。
By Q姐（越過觀塘廠廈走過中環置地）

初出茅廬被人呃

「負皇」初出茅廬，幫間餐廳仔做會計，逢星期五要做埋跑腿去銀行入數。某個星期五，「負皇」如常帶住十幾萬去銀行入數，當佢行到一個僻靜點，有個戴cap帽嘅男人攞住一支硬物撲出嚟要「負皇」交出包錢。「負皇」細膽兼未見過風浪，梗係驚到腳都軟，唔敢叫唔敢追，交出包錢後就一支箭喊住跑返公司。當年嘅「負皇」好單純，不斷被老細嚇，話「負皇」唔即場求救，如果報警一定會令人起疑。最後炒咗「負皇」唔賠錢之餘仲屈佢簽份同意書，迫「負皇」承擔番責任，係大拿拿十幾萬。對一個仲還緊grant loan嘅年輕人嚟講，十幾萬係一個天文數字。「負皇」敢怒不敢言，只好每個月死慳死抵，分期還返畀呢個老細。

提番起呢件黑歷史，「負皇」不單冇嬲，仲講笑咁話：「當年未興網絡情緣騙案，我寧願呢十幾萬係被『哈里王子』呃咗，起碼都開心過吖！」踏入2023年，估唔到「負皇」學識咗從自嘲中得到快樂，祝願呢份快樂能徹底擊退佢心中隻負能量惡魔。