軒仔張敬軒將於3月16日在英國倫敦Royal Albert Hall舉行三場《The Prime Classics Hins Live in London 張敬軒倫敦演唱會》，他是首位於這個殿堂級場地舉行三場演唱會的華人歌手。軒仔昨晚（6日）出發飛往倫敦「備戰」，現場逾300名歌迷送行，場面墟冚。

適應時差提前10日備戰

向來嚴謹的軒仔這次跟團隊特意提前10日前往英國，「主要係適應時差，等自己狀態好啲。同埋能夠喺一個咁殿堂級嘅場地開演唱會，真係好榮幸。加上係第一次喺呢個場地表演，好多嘢都唔熟悉，所以自己同團隊早啲過嚟，希望所有嘢都好好準備，可以帶俾觀眾一次好好嘅音樂旅程。」主辦方為隆重其事，亦特別book了世界級殿堂錄音室「The Church Studios」為今次演唱會進行綵排，英國天后Adele亦曾於「The Church」錄音。

500名歌迷將飛倫敦撐場

昨晚機場外早已聚集了大批軒仔的歌迷，一向愛錫fans嘅軒仔得知歌迷已等候數小時，甫下車便跟他們簽名、合照，並謂：「好耐都冇見大家唔戴口罩個樣。」又多次表示：「多謝大家咁山長水遠嚟到。」有歌迷索性叫軒仔「帶埋我走」，軒仔就話：「但我啲行李已經爆曬啦喎，咁我要買個大啲嘅喼。」歌迷則大唱：「來讓我跟你走，流浪天邊海角⋯⋯」歌詞回應，聽得軒仔十分冧豬。除了送機，軒仔的香港官方歌迷會內更有超過500名歌迷，將由香港飛往倫敦支持軒仔，認真厲害。