承印:觀傳媒集團有限公司   地址:香港灣仔駱克道283號華興商業大廈1001室

入行40年玩勻歌影視 林敏驄:功力足應付任何project

-

入行40年玩勻歌影視 林敏驄:功力足應付任何project

娛樂圈的確好玩,可以有不同的嘗試和挑戰。入行40年的林敏驄,玩勻歌影視,去年首次拍劇《下流上車族》,便被網民封「民選視帝」,但他從不恨用獎換job,笑言想要獎座可以去淘寶。

文:比華利|攝:Marco Shum

已「登六」的林敏驄,月底生日便年届64歲,入行40年,他最為人熟悉是八、九十年代創作的經典金曲,前奏響起便琅琅上口,首首都耳熟能詳,陪着不少港人成長。

阿驄的鬼才,一直為觀眾帶來不少歡樂。他游走歌影視圈,及至去年才應無綫高層曾志偉邀請,接拍處男電視劇《下流上車族》,「車總」一角大受歡迎,更成為熱搜。網民激讚阿驄的演技,甚至封他做「民選視帝」。

演藝事業講timing 拍電視幾過癮

《下》去年即拍即播,開工時正值疫情第五波,阿驄也說,「估唔到部劇咁快拍完,咁快就上,又咁快上完,反應仲好好, 所有嘢預計唔到。可能冇疫情,大家都會做緊好普通嘅嘢 」,就是一切不在預期之中,造就了天時地利人和,也為他帶來這個驚喜。

玩勻歌影視,阿驄覺得哪一樣最好玩?「全部都好玩,唔同時間做唔同嘅嘢。」他出道是作曲填詞,其後有做主持和拍電影,去年就首試拍劇,不能不說,演藝事業就是講timing,阿驄續說:「拍電視係幾過癮,好直接嘅,套劇推出,好唔好反應即刻知。」

林敏驄與江美儀、郭柏妍(左一)和羅毓儀(右一)在電視劇《下流上車族》扮演一家人。林敏驄fb
林敏驄與江美儀、郭柏妍(左一)和羅毓儀(右一)在電視劇《下流上車族》扮演一家人。林敏驄fb

「飯就有啖食,但唔會發達囉」

經驗和閱歷令阿驄無懼接受不同挑戰,「到咗我哋呢個age,好free, 好多嘢係互通,好多功力都喺晒度,足以應付任何project。煮到嚟咪食, 有唔同既嘅人,搵你做唔同嘅嘢,咪考慮吓囉,咁啱拍劇未試過。」連電視劇也拍過,阿驄表示剩下未玩過舞台劇,躍躍欲試,「我都未試過,如果到時又有人搵,我咪又睇吓到時有冇興趣。隨機應變,都做咗咁耐。」

這番話,是否代表阿驄此刻已達人到無求,也不憂沒錢?阿驄一聽即反問:「點會唔憂?」他想了想再說:「飯就有啖食,但唔會發達囉!」換句話說,意味着接job要睇錢行先?換獎又得唔得?「攞獎留番你喇!攞嚟做乜鬼,冇用嘅。」又啱,阿驄早年是樂壇頒獎禮常客,金曲為他帶來大堆獎座,「以前好多獎座都唔見咗喇,有啲仲用嚟墊嘢、壓嘢。以前(拎獎)好矜貴,但都係啤嚿膠出嚟,淘寶都有喇,隨時淘幾個返嚟。」

阿驄話講錢最實際,只是說笑,他對挑選工作甚有要求:「睇吓搵我做咩角色。」如果鍾意,他會𦧲飯應:「食咗啖飯都要𦧲番出嚟,貼錢亦得,貼少少冇所謂。」當記者笠高帽大讚他人到無求品自高,阿驄又來無厘頭,「我都冇咩品!」或許開開心心,嬉戲人生,就是阿驄對演藝事業源源不絕的熱忱。

網民like爆車總

林敏驄憑無綫劇集《下流上車族》人氣急升,該劇以港人買樓上車做題材,阿驄扮演的超級市場經理「車總」車志明,為了達成與家人的「上車夢」,不惜出動下流招數。他與江美儀扮演夫妻的戲份吸睛,雖然最後只有江美儀奪得無綫視后,但阿驄也不輸蝕,被網民封「民選視帝」。

網民有話說

驄哥演活咗角色、有血有肉,非一般膠劇演員可以媲美⋯⋯視帝與否並不重要!最重要驄哥係用個心去演出,畀我哋睇到驄哥感性嘅一面。

想不到你的演技是如此好,甚麼劇情配甚麼表情也剛好到位,不多不少!

驄哥首次拍劇,但演技超班,令人驚喜!

車總搞笑兼有演技,送1000000000個like畀你!