林敏驄將於本月18日和19日在西九文化區舉行兩場個人作品展演唱會 ，名為「蘇格蘭場今天星閃閃林敏驄暨車總腦交戰時日如飛40周年成人禮作品展演唱會之PART 2 更精采」。圈中人緣甚佳的阿驄宣佈開騷，據悉其好友三嫂、苗僑偉老婆戚美珍已訂購了大叠門票捧場。

隔空呼喚關淑怡出山助陣

這個騷的賣點，當然又是星光熠熠，阿驄過去創作無數經典金曲，主唱歌手樂於撐場作品展。「我有好多好歌，多到有啲都唔記得咗，時日如飛，𠵱家聽番都覺得好正，觀眾角度，失驚無神一首又一首，好touching，唔好話邊個唱，淨係聽番啲歌詞，仍然好震撼。隻隻歌都有段記憶，令你返去當時情景。」

阿驄近日不停更新嘉賓名單，甚至隔空呼喚關淑怡出山助陣大唱《再會》：「依家全城呼喚關淑怡，真係要睇緣份，佢嚟到咪嚟， 嚟唔到都冇辦法。」阿驄大爆已聯絡了雷安娜會由加拿大回來演出，「佢首《彩雲曲》真係好聽。上次我開騷，佢返唔到嚟，今次佢就到時間。我愧對呢班歌手，平時又唔搵人，要幫手先搵人。但大家都好忙，大家都未停過，𠵱家開番關，大家都去搵錢喇！」問到阿驄自己會選唱哪一首金曲？他搞笑說：「咁多人都唔使我唱喇，我淨係用個名搵錢，我出來收飛、收銀呀！」