Gin Lee即將出新歌《單戀這件小事》，歌名與單戀有關，她推介，「可能你有心底話，含蓄怕醜唔想講，可以透過呢首歌去表白，聽完首歌就會明白」。

35歲的Gin Lee自爆大學時曾向心儀對象表白，「冇好直接，但我有辦法令對方知道我鍾意佢」。令她迷上的男生，優點數不盡，「佢靚仔，好有才華，係我好仰慕嘅一個對象，嗰時我好欣賞佢，成日都想見到佢，我會為佢做一啲連自己都估唔到會做嘅嘢，我從來唔覺得自己係一個浪漫同細心嘅人，因為佢，我會去做一啲手作同小禮物 ，好似摺星星咁送畀佢，寫埋心意卡。」

人生規劃會結婚

Gin Lee的付出，最終有回報，「我都有得到佢嘅鍾意，但最尾卻冇一齊。不過一切對於我嚟講都刻骨銘心，現時諗番都覺得好甜蜜，我將經歷攞出嚟做題材放喺呢首歌內邊」。她認同遇到對的人應該勇敢示愛，「遇到啱嘅人，可以有技巧話畀佢知，你有興趣同佢繼續發展，我自己未必會直接表達，但可以有好多方法去表示好感」。

問Gin Lee覺得大馬和香港的男生，哪個較好？她表示各有各好，「我鍾意香港男仔積極、上進，可能呢個城巿好大競爭，要好醒目，我鍾意嗰種衝勁，好有energy，但我亦鍾意馬來西亞男仔嗰種單純、簡單同熱情，好chill。」Gin Lee的人生規劃是會結婚，她說：「始終有一日會結婚，但唔知幾時，緣份嚟就嚟，但未必會生仔。」