由宋慧喬主演嘅《黑暗榮耀》抓起煲劇潮，劇中嘅校園欺凌情節十分誇張。其實職場欺凌絕不能忽視，處理不當就會引發出好大嘅管理問題！

By Q姐（越過觀塘廠廈走過中環置地）  圖﹕❮F檔案❯劇照

HR亞姐Rachel：老細，會計部Raymond投訴被幾位女同事職場欺凌兼性騷擾，話如果公司唔處理，佢就向平機會投訴。

老闆：咁嚴重？班女同事對佢毛手毛腳？Rachel： Raymond話班女同事笑佢「短」。老闆：吓？？班女同事又知佢短？

崩口人忌崩口碗

對於呢個問題老闆非常好奇，決定親自出馬。三個女同事矢口否認有騷擾過Raymond，仲好努力諗下發生咗咩事引起咁大誤會。

老闆﹕你哋可唔可以解釋下呢？Connie：嗰日我哋喺Raymond個位附近吹水，講緊行政部為咗縮減開支，連鉛筆都要我哋用到短過3吋先可以換。Lily即刻插嘴：我記得啦，Connie你仲好大聲話「癡線！三吋咁短好唔暢快㗎嘛！」Connie：我講畫圖咋喎！

Raymond點解會聯想到講佢㗎？老闆聽完即刻面有難色：你哋女人唔明㗎啦，崩口人忌崩口碗嘛！無事嘅，等我解決。Lunch後，老闆叫Raymond入房，同埋叫埋Rachel同我見證。

老闆﹕上次喺男廁裏邊口多多同你討論短小情悍呢個問題純粹講笑，引起你誤會，我衷心致歉。真相大白，原來Raymond嘅玻璃心係因老闆而起。事後Rachel問老闆，你無端端同Raymond討論短小情悍呢個議題，你又可唔可以解釋下呢？老闆笑而不語。