現年57歲音樂人吳國敬最近爆出被拍拖17年圈外女友Elaine狠飛，有指因為疫情影響，阿敬入不敷支，無奈返大灣區撲水做音樂，希望為Elaine和愛犬提供好生活，不過二人因聚少離多，分手收場。

阿敬和Elaine拍拖期間，愛得甜蜜，男方的確有結婚念頭，不過近年因為價值觀不同，距離變大，最終分手收場，身邊友人都大嘆可惜。Elaine並非傳聞所指嫌棄阿敬收入少，據知二人相戀期間，一直經濟獨立，Elaine有做生意。分手後，Elaine與阿敬再見亦是朋友，鼓勵他北上工作，男方離港時，Elaine也幫忙照顧阿敬養的金毛尋回犬金金。而牠早前發現患癌要接受治療，Elaine都獨力支付金金的13萬手術費，並未有要求阿敬負責，不過阿敬返港至今未探過金金。

Elaine表示自己並非圈中人，對於外間負評，她接受《觀》訪問時不欲多言：「我哋分咗手，但大家關係好似親人一樣，佢有事我都擔心，希望大家可以畀空間我哋，我唯一可以講，大家過去一齊17年從來冇諗過共唔共富貴，但我同佢共嘅患難比佢身邊任何一個朋友都多。」