靚太沈卓盈(Jess)本月5日牛一，獲閨密徐菁遙(Suki)、陳自瑤(YoYo)安排為壽星女開船P，並邀得好姊妹何天兒(前名何傲兒，Lily)、有線主持黃芳雯（Paula）等出席，天氣漸熱，眾女大解放，七女齊齊換上性感裝束上船大玩，她們更趁機打卡，靚相貼社交網吸睛。

Suki和YoYo是這次船P的主要搞手，二人為壽星女Jess製造無限驚喜，由布置、蛋糕和食物，全部都十分精緻，令Jess十分感動。Suki表示這個生日構思原是慶祝Jess去年40歲牛一，但礙於疫情影響，未能聚會，索性今年大搞一番。

老公頂更湊仔

Jess的橙色單肩裝，盡顯fit爆身型，她笑言為了靚，一周前開始節食減肥，不過其實她一向有做運動，產前後都纎瘦，尤其今年初家中外傭離開，新工人未到，她要兼顧做家務和湊仔，忙到沒停手，連食瞓時間都沒有。幸好老公是神隊友，與她分工合作，因為生日關係，老公又特別「頂更」讓老婆有me time，Jess說：「沒有工人呢幾個月，我外出要同老公夾時間，大家都好有默契，平時都係快出快返，嗰日船P，老公幫手，我可以安樂由下晝2點玩到夜晚9點，鬆一鬆好開心呀，真係好耐未出過去玩。」雖然媽咪要出去威，但她臨行前都為囝囝Jayden煮好當日三餐，不用老公費心和囝囝捱餓，非常細心。

問到船P有甚麼玩意？「咁啱疫情又過去，呢次可以同我班姐妹一齊聚吓!我哋食吓嘢，傾吓偈同唱下K，正呀!」相中見到Jess興奮拿着香檳，她說：「道具嚟，我飲酒敏感，我唔飲酒呀。」