鄧梓峰一直被爆是「隱形富豪」，家族資產逾20億，他行事低調，不炫富，被指擁豐厚身家的他解畫說：「人哋問親我，我都會話將嗰20億入晒八達通，你攞去嘟喇！」

不忌諱跟子女們談生死問題

有報道指鄧梓峰要花盡財產不留給四名子女，事實他早為下一代安排妥當，他直言已預立平安紙。他表示從不忌諱跟子女們談論生死問題：「我冇避忌呀，一早同仔女講定，將來（自己）瓜老襯要點樣搞後事。」他續說，「我唔係儲定錢將來分畀佢哋，而係萬一我突然唔喺呢個世界，擔心佢哋會唔會好傍偟。」

所以，鄧梓峰索性坦然先安排一切，「呢樣嘢，我從爹哋度學番嚟，佢過身前七、八年，爹哋已同我哋講好晒，想點樣搞身後事，甚至乎佢想播咩音樂，仲畀埋錄音帶我。記得嗰次同佢開車去打波，佢話播呢啲音樂，到時莊嚴啲，佢嗰種態度，令我覺得呢樣唔係一種忌諱，係會令子女會容易處理，仲會安排得好啲。我成日同仔女坦誠講，呢啲先係我要為佢哋準備嘅嘢。」