輕輕鬆鬆鄧梓峰。鏡頭前的他表現淡定自然，鏡頭後的他也是性格樂觀，貫徹始終，充滿正能量。Blue monday的下午，鄧梓峰孖友人Fred，出動越野四驅車去山旮旯，挑戰陡峭的山坡，野外嘆high tea，「咁形式嘅訪問，我未試過，兩架Jeep上山，擺張枱，飲吓咖啡，我覺得幾大享受」。

文：比華利｜攝：Marco Shum

62歲的鄧梓峰，外貌比實際年齡後生，養生之道值得參詳，「一直以來保持青春，可能係我份好奇心，一個人成日有呢種好奇心，亦會有童真，思想同外形上都份外有活力。」「登六」的鄧梓峰貪玩，「所以咪約Fred出來，玩少少難度又刺激嘅越野四驅車，呢種咪好奇心囉。」

喜探討新事物，為鄧梓峰帶來正面影響，工作每遇低潮，好奇心就呼喚他，「我會用學習轉化唔開心嘅情緒，唔會鑽牛角尖。」人生必有高山低谷，過去幾十年間接讓他不停發掘出新興趣，並先後學了德文、法文、潛水、揸小型飛機、打高爾夫球和夾band，「我會將負能量轉化成機遇，平時冇機會學嘅嘢，趁機去學。」他卻遺憾，「好多嘢學得唔夠深度，只有闊度。」

違背家計會 樂做多仔公

1988年入行至今，三十五年的演藝生涯，鄧梓峰婚後都沒預計變了多仔公，違背家計會「兩個夠晒數」的宣傳口號，生了兩子兩女，兩公婆變成六口大家庭，「嗰時都唔鼓勵生咁多，我生咗四個，壓力都大，有段時間都捱得好辛苦。」

鄧梓峰要狂接騷養家，在無綫由朝早到晚做勻《香港早晨》、《城巿追擊》和《歡樂今宵》，全年爆騷多達300個，也被邀拍劇。他有戲癮卻不敢全情投入，礙於電視台綜藝和劇組不協調。「 我做開綜藝節目，劇組係唔會搵我，劇組霸道少少，要咗你個人去拍劇，基本上幫你推晒公司內部同外面嘅工作。」權衡喜好，他揀了入綜藝組，「當年如投入拍劇，可能我會忽略咗好多同屋企人相處嘅時間」。相對付出較少，他拍劇往往佔戲不多。

做好眼前嘢 先諗將來

論圈中好好先生，鄧梓峰當之無愧，「我認同修哥（胡楓）喺金像獎上講自己人緣好，因為從唔會同人爭排名、戲份同角色，我都係，我從來唔會特別去巴結某啲人，又唔會為想做乜嘢角色向監製𠼱，同事唔會視我為假想敵，大家相處和諧。」那可想「序」有應得捧獎？「有就歡迎，冇獎但獲觀眾認同，仲勝過有獎。」鄧梓峰熱愛演藝工作，永不言休：「我嘅口頭禪『做好眼前嘢先諗將來』」。

人生過半，鄧梓峰的兩名女兒和一對孖仔雖孭着星二代身份，但抗拒入娛樂圈，他們學有所成，各有事業，不用父母費心，令他大感安慰，事業家庭兩得意，他感恩說：「我絕對算人生大贏家，子女長大出身，擔子輕咗，而家有多啲時間，放慢空間做自己鍾意嘅嘢。」

用心培育 十星爸爸

如要為鄧梓峰的輕鬆人生加tag，一定走唔甩演員、司儀、老公和爸爸四個關鍵詞，四重身份，以五星評分，他說：「做演員，五星喇，不過冇機會畀我表演出來啫。司儀梗係五星以上，『凸星』呀，回想過往做過好多難忘嘅大騷，彈藥庫儲齊好多彈藥。」

「做人老公都係五星，過往無論工作幾忙，必會分配時間陪伴家人，見證孩子成長。」講到家人，他懷念夫妻帶着孩子出遊的family trip：「而家佢哋大晒有自己生活，好難夾時間一齊出去玩。」至於做爸爸，他自信說：「我培育仔女有正確價值觀，咁我呢個爸爸肯定係十粒星，比其他幾項多一倍，我係咪自信爆棚得滯？」