經歷3年多疫情，annual dinner終於復辦。女同事當然雀躍啦，可以扮到隻彩雀咁靚喺間五星級酒店打卡。望清楚張通告，咦？司儀係HR Rachel姐同CFO陳生? 大家都好奇，點解去得五星級酒店搞，仲請咗歌星唱歌跳舞，司儀呢個咁重要嘅崗位竟然搵同事做? 我去pantry收收風，終於明白陳生做司儀唔係因為愛，係因為窮呀！公司budget唔夠，租酒店又要請歌星，唔夠錢請專業司儀，陳生咪自動請纓囉！陳生愛出風頭係人都知，平時公司有乜活動，都會着住套Armani西裝滿場飛。今次做司儀就真係滿足晒佢嘅表演慾！

By  Q姐（越過觀塘廠廈走過中環置地）

老細行先一步

Annual dinner當晚個個飲到面紅耳赤，氣氛澎湃。根據rundown，抽獎後就全體大合照，再輪到部門各自影。陳生：「大家都飲飽食醉，輪到大合照時間啦，有請老細上台。」大家興高采烈咁上台，擾攘一輪，終於排好位影大合照。同事士氣高昂、情緒高漲，高呼「生意興隆、個個賺到盤滿缽滿，yeah！」。陳生:「多謝大家，係時侯影部門合照喇，請老細行先一步落下面等。」突然全場鴉雀無聲，2秒後終於有人忍唔住爆笑，然後全場一齊起哄。台上嘅老細塊面黑過包公，當時佢應該諗緊究竟好唔好「行先一步落下面」呢?  陳生當然尷尬到核爆，最後要Rachel姐出嚟解圍：「請老細留步，同各部門同事一齊影大合照。」此時，老細鬆一口氣，陳生亦鬆一口氣，面都紅晒咁話：「老細，辛苦晒！」