今日是一年一度的母親節，隨着疫情退減，大家都安排節目帶媽咪外出慶祝。薛家燕、向海嵐、七仙羽、黃婉曼、敖嘉年、無綫劇集《愛回家》的「賈名媛」邱芷微和魯振順等，今日被邀出度西九龍中心的母親節活動，現場擠滿湊熱鬧的觀眾，迫爆商場各層圍觀。

文、攝﹕比華利

口才了得的黃婉曼，一身pink lady打扮做活動司儀，欄外粉絲也特別帶着禮物送這位靚媽，她表示工作後就回家陪伴囡囡，今日抽工去工作，要多謝神隊友老公幫忙。

向海嵐打頭陣大唱《幸運是我》，歌曲同時獻給台下的媽咪，她唱了幾句歌詞即眼濕濕，並偷偷取出紙巾揩抹，其後還邀請媽咪上台，向海嵐大方分享母女相處之道，她笑言：「媽咪係百彈齋主，見我做乜都話唔好。」其實向媽媽用心良苦，想囡囡有更多進步空間，她又即場給媽咪送上鮮花和獻吻。向海嵐覺得孝順媽咪是要抽時間陪伴，她續說：「唔好成日只係用電話溝通，真係要陪佢多啲，人與人溝通，用短訊係感覺唔到語氣，我好鍾意放假陪媽咪煲劇。」

家燕媽媽獲囡囡驚喜獻花

已升呢嫲嫲的「家燕媽媽」，她出場時獲不少歡呼聲，她分享跟子女關係融洽，尤其重視直接溝通，並建議子女若想表達對媽咪的愛，要放低手機，不妨面對面與親人多講「我愛你」和「 I love You」，家燕姐的兩名囡囡還驚喜現身上台送花，氹到她笑不攏嘴，其後大會工作人員又安排家燕媽媽落台給現場媽咪送花，齊齊慶祝這個溫馨節日。

七師傅讚敖嘉年有孝順樣

同樣人氣高企的七師傅，雖然沒有子女，但現實生活她都是孝順女，回想媽咪對她的教導，七師傅說：「細個時媽咪畀我好大自由度，可以自由發揮。」於是令她成長更獨立，七師傅認同家燕媽媽所言多關懷媽咪，她搞笑說：「多啲表達愛，媽咪都想得到子女問候，所以我朝早問候，夜晚又問候，一日三次。」問到七師傅覺得孝順仔女有冇樣睇，她即點名同場的敖嘉年：「佢有孝順樣，搵老公、仔女投胎都係佢咁樣，佢人品溫和、老實又善良。」