重新出發|黃婉曼追求身心靈健康 茹素學佛笑多啲

-

重新出發|黃婉曼追求身心靈健康 茹素學佛笑多啲

閱歷令人成長。

「我就嚟都40歲,好幸運就係人生嘅一半。」身處轉捩點,黃婉曼(Icy)為下半生重新出發,她首要任務保持身心靈健康,做一位負責任媽咪,照顧好家人。

文:比華利|攝:Marco|場地:Wow Fitness

黃婉曼9月將重返校園修讀佛學。
黃婉曼9月將重返校園修讀佛學。

39歲的黃婉曼,過去17年,身份越加越多,順序去數,大學畢業後當了新聞記者,跟着天氣女郎、人妻、人母、餐廳老闆娘和女主播等,學無止境,她9月將會重返校園修讀佛學,笑言與囡囡一齊做學生,陪伴成長。

人大了,面對生離死別,尤其傷感,Icy坦言喪失至親後更有頓悟,「生活好多憂慮,需要一啲道理去陪伴自己,彿學除咗導人向善,仲好多道理,佛學教識我『過去心不可得』,諗起過去嘅唔開心,好快就止住,就算幾大煩惱同困難都係虛無,我會輕鬆晒。」Icy鑽研佛經後,更覺得它博大精心,於是就去報讀相關碩士課程,決心向智者學習更多。同時遵守「五戒」——不殺生、不偷盜、不邪淫、不妄語、不飲酒。

有情飲水飽

往日喜好開心碰碰杯的Icy,現已滴酒不沾,「以前飲酒係好開心,我都有開心過,有同我啲朋友盡興過,飲酒會令人放鬆,有時會冇咁理智,我而家有情飲水飽,同朋友傾偈飲茶都好開心。」

Icy追求身心靈的健康,她也開始茹素,「有次去街巿買餸,見到一條魚被𠝹出一條血痕,佢都係生命,都會好痛,我唔想傷害佢,嗰刻開始就轉食素。」有甚麼健康小貼士?「飲水好重要,每朝起身都會先飲一杯暖水,補充水份,清淨吓身體。 唔好太夜瞓,最緊要笑多啲,健康身體外都要有健康心靈,個人開心啲就變得有活力。」Icy也會分配時間做運動。

身兼數職的黃婉曼,慶幸一直以來獲丈夫分擔生活上嘅種種煩惱。圖為黃婉曼一家四口。
身兼數職的黃婉曼,慶幸一直以來獲丈夫分擔生活上嘅種種煩惱。圖為黃婉曼一家四口。
黃婉曼的健康小貼士是笑多啲,個人開心啲就變得有活力。
黃婉曼的健康小貼士是笑多啲,個人開心啲就變得有活力。

最自滿老婆身份

好不容易捱近3年的疫情,疫後復常,Icy的生活習慣都有很大改變,「疫情令我哋生活簡單咗,避疫期間都係留喺屋企陪住家人,而家都延續呢個習慣。」疫下減少跟友人聚會,「真心朋友唔需要成日見,個心都一直喺度。」

雲淡風輕面對每一天,讓Icy更充實。問到此刻最喜歡自己哪一個身份?她選擇了做「馮太」,「因為冇咗老婆呢個身份,我唔會做到媽咪,跟住先有兩個女,佢哋係我人生一切,未來都要好好花時間同佢哋一齊。」她兼顧了事業與家庭,處理得井井有條,但就謙虛不認是多功能老婆,請她給自己評分,「 70分喇,我唔算一個EQ太高嘅人,但好慶幸有另一半同我分擔生活上嘅煩惱、湊女同佢哋教育問題,好感激有神隊友嘅存在。」Icy感恩身邊一直有老公這位神隊友支持,他值得畀99分,留點進步空間。