職女密語|急推AI搞到一鑊泡

-

職女密語|急推AI搞到一鑊泡

高盛的經濟學家研究報告指出全球18%職位可能會被AI取代,一向以為自己走在時代尖啄嘅老細,睇到呢單新聞異常興奮,急急搵IT同顧問公司研究用AI代替某啲部門員工。首當其衝試驗把AI導入嘅就係人力資源部,負責同事請假、招聘等安排。老細日前開會正式介紹公司試用AI呢個消息,仲隆重其事介紹AI叫Brain。

By Q姐(越過觀塘廠廈走過中環置地)

我朝上起身天旋地轉,正想打電話通知HR請病假。突然醒起,作為老細身邊的我,就梗係大力支持用AI,於是就用手機app連上了Brain:「你好,我今天頭暈,想請病假一天。」簡單清楚的指示,心諗Brain應該明白。Brain回答:「你好,我很抱歉聽到你生病了。請好好休息,你今天有甚麼重要的工作需要我幫忙嗎?」咦,一於叫Brain通知埋老細我請假。「請替我通知老細,我頭暈需要請假吧,再安排芳姐幫老細準備咖啡。」Brain回答我說:「我會幫你辦妥,祝早日康復。」

Q姐頭暈要辭職?

我心裏暗爽,可以安心瞓覺了,反正有Brain幫我搞掂晒。點知唔夠15分鐘,我電話就開始響起。先是芳姐:「Q姐,Brain話你病咗,老細要準時飲咖啡,每4小時一次每次一杯,仲要不能空肚飲咖啡。」接着係HR Rachel姐:「Q姐,頭暈唔使搞到要辭職嘛?Brain幫你寫咗封辭職信畀我,仲CC埋畀老細呀!」吓? 咁大鑊! 唔夠5秒,見到老細來電,我個心離一離。「亞Q,搞乜鬼呀?Brain話你重病要辭職好好休養。佢仲幫我cancel晒所有會議,叫我準時飲晒啲咖啡然後返屋企好好休息。」估唔到Brain成為史上最快被炒魷嘅員工。老細宣佈擱置使用Brain,直至技術成熟再考慮重新推出,大家又可以安心唔使咁快被AI搶飯碗了。